Romero: Arubus tin apenas 14 bus (di total 43) trahando

ORANJESTAD - Arubus tin apenas 14 bus den operacion for di e 43 bus cu nan tin total. E otro 29 busnan ta daña y no den operacion. Asina minister di transporte Chris Romero a divulga durante tratamento di presupuesto diabierna ultimo. E compania tin problema financiero tambe mirando cu tin 4 miyon florin na subsidio cu gobierno no a pasa pa e compania.

FUTURO

A mustra cu e compania tin mester di un flota nobo di entre 30 pa 40 bus, pero cu debi na e situacion financiero, esaki lo tin cu bay den fase. Gobierno a pone 3 miyon pa aña, cu por percura pa compra di 10 bus cada aña. Segun Romero, no por haci otro ya cu mester resolve esaki den un forma structural y responsabel pa no perhudica e operacion di e compania. Ademas, ta papiando cu trahadornan y tur otro stakeholder pa percura pa resolve tur otro problema interno cu por tin aworaki.