ORANJESTAD - Awe e acuerdo di e lantamento di e Unidad di Traficacon y Contrabanda di hende a wordo firma na Oranjestad pa Minister di Husticia, Seguridad y Integracion, Procurador-General di Aruba, Alto Comisario di Polis y Comandante di Koninklijke Marechaussee.
E creacion di e team especial aki di Recherche ta forma parti di e Plan van Aanpak Integral di Aruba pa combati mensenhandel y mensensmokkel pa e periodo di 2018 te 2022, cual tambe a wordo lanza oficialmente awe pa e Minister di Husticia, Seguridad y Integracion.
UMM
E Unidad di Mensenhandel y Mensensmokkel (UMM) ta bao guia di un fiscal di husticia y a wordo lanta na 2017 como unidad di investigacion operacional. Tanto Ministerio Publico, como Cuerpo Policial di Aruba y Marechaussee ta forma parti di dje. UMM ta enfoca penalmente riba mensenhandel y mensensmokkel y tin (entre otro) como meta pa:
investiga y persigui sospechosonan elimina organizacionnan criminal y bay tras di corientenan ilegal di placa acumula y comparti informacion tocante mensenhandel y mensensmokkel kita capital criminal procedente di mensenhandel y mensensmokkel. Pa cu esaki UMM ta traha hunto cu Afpakteam.
Exitonan
UMM a logra varios exito caba desde cu el a wordo lanta aña pasa. Desde e tempo ey 7 caso di mensensmokkel a bay Corte. Na e momento aki tin 3 investigacion di mensenhandel andando.
Operacion Libertad
Na inicio di april 2018 UMM a forma parti di un accion hopi grandi multidisciplinario di mensenhandel yama “Operacion Libertad” bao guia di e coordinador nacional di mensenhandel. Varios departamento a forma parti di e accion aki, entre nan Ministerio Publico, Cuerpo Policial di Aruba, Kustwacht di Aruba, DIMAS, Marechaussee, DAO, DVG, FIOT, Marina Real y Oficina di Victima. E accionnan penal/administrativo a dura 4 dia largo y a tuma lugar tanto riba lama como riba tera.
Riba lama tabatin controlnan conoci como “100% controles” na lugarnan na costa di cual ta conoci cu ta trafica cu hende ey, y na companianan di watersports.
Riba tera tabatin controlnan entre otro, na un restaurant, un sitio di construccion, hotelnan y algun joyeria y un posible burdel ilegal.
Unico den region
E accion multidisciplinario aki ta pas den e Plan van Aanpak Integral cu a wordo firma awe pa bringa mensenhandel y mensensmokkel y ta unico den nos region.
Bao guia di un experto riba tereno di mensenhandel/mensensmokkel cu ta traha pa Ministerio Publico di Aruba, a bin cu Plannan van Aanpak Integral pa Curacao, Sint Maarten y Islanan BES, mirando cu e experto di Aruba ta coopera cu e paisnan aki tambe.
Den e Plannan van Aanpak aki cu a traha pa e otro paisnan, ta describi (entre otro) con necesario ta pa e varios instancianan di gobierno coopera cu otro. Na Aruba e cooperacion aki ta funciona pa basta tempo caba den forma di e Taskforce Mensenhandel/Mensenhandel. Durante e accion Operacion Libertad a keda comproba un biaha mas cu e cooperacion aki na Aruba ta bayendo hopi bon mes y ta masha valioso.
Bringa mensenhandel y mensensmokkel tin prioridad halto pa Pais Aruba y pesey e Procurador-General a firma awe e liñea di maneho nobo riba e tereno aki.
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.