Corte: Gobierno mester sigui paga huur di edificio nobo di DTI

ORANJESTAD – Gobierno mester paga Aruba Villas NV e huur atrasa di e edificio nobo di DTI na Barcadera (balora na un total di AFL 270.288) te ora cu bin un claridad riba validez di e contracto cu e NV a firma cu gobierno na September di 2017. Ademas te ora cu tin e claridad ey, gobierno mester sigui paga e huur (mensual di AFL 67.572) basa riba e contracto inicial firma.

HUURCONTRACT ORIGINAL VS INTERIM

Abogado pa Aruba Villas NV, Ronny Wix a mustra NoticiaCla cu contrario na pensamento di e contra partido, ta trata di e huurovereenkomst inicial y no e contracto interim cu gobierno kier a traha riba, ya cu esaki ta vence 30 di april y no tin ningun valides mas. A compronde mientrastanto despues di e caso awe mainta, cu gobierno defacto a cumpli cu 3 luna di pago di huur y falta un luna ainda. Huez a mustra tambe cu e huur cu falta, mester wordo paga y e proximo lunanan mester paga esaki tur 1 di luna, sino e abogado di Aruba Villas NV, tin e derecho di pone beslag riba cuenta di gobierno.

ESENCIA DI CASO

E esencia di e caso segun Wix, ta e hecho cu ora cu gobierno nobo a sinta na November (gabinete Wever Croes), e minister responsabel pa e cartera di Infrastructura, Otmar Oduber, no kier a honra e contracto mas pasobra e ta considera cu e minister anterior (Benny Sevinger) a faya den firma un contracto como parti di e asina yama ‘afscheids beleid’. Como tal e contracto no por ta valido y kier declara esaki nulo. Sinembargo e partido demandante ta argumenta cu nan tabata bezig pa 1 ½ aña pues no por considera esaki algo nobo sino un lopende zaak. Gobierno a argumenta di nan banda, cu e contracto aki no ta bon pa varios motibo. Entre nan, no tabatin un destaho publico, e edificio nobo su huur ta mas caro cu esun ‘bieuw’ siendo cu e edificio nobo ta mucho mas chikito, tin yen di fayo na e edificio (tecnico) y na fin, tin un fayo pa loke ta e operacion unda cu cierto trucknan no por keur, sin trece trafico na peliger (debi na e infrastructura cu no ta duna e trucknan espacio pa maniobra manera mester ta). Abogado Wix a argumenta cu tur e puntonan aki ta a keda coregi pues no ta valido y a purba desbarata uno pa uno.

PROBLEMA PA PAGA

Na final, gobierno su abogado a mustra cu no tin problema pa paga, y cu de hecho ta pagando e huur. Aki huez a mustra cu si no tin problema pa paga, “pakico nos ta akinan anto”. Huez a dicidi e ora pa ordena gobierno cumpli cu e pago atrasa, sigui paga te ora cu tin e caso di profundidad (bodemprocedure) den cual tin mas tempo pa por argumenta e validez di e contracto. “Wak boso ta bon prepara, documenta e biaha aki” huez a bisa e abogadonan di gobierno, mirando cu riba varios pregunta e abogadonan di gobierno no por a contesta e pregunta(nan) di huez. Aki 4 siman mas sigur e bodem procedura ta cu tin cu determina e validez di e contracto.