Hulanda un biaha mas a pone geschillenregeling ‘on hold’

DEN HAAG – Por lo pronto Aruba, Curaçao y Sint-Maarten no por conta cu un asina yama ‘geschillenregeling’, osea un huez independiente cu por atende disputa di e islanan cu Hulanda ora cu nan ta den desacuerdo cu decisionnan tuma na Den Haag. Esaki pasobra gobierno Hulandes a pone e asunto ‘on hold’. Asina secretario di estado Hulandes pa asuntonan di Reino Raymond Knops a declara. Pa e mandatario esey no ta un prioridad awor. Su atencion awor ta pa e reconstruccion di e island di St Maarten.

INDEPENDIENTE

E tres islanan menciona por tin nan propio parlamento y gobierno, pero gobierno di Reino Hulandes por duna nan un ‘orden’ riba nan maneho. Ministernan Hulandes p.e. por obliga e islanan pa adapta nan presupuesto of organisa un eleccion.

WARDA 20 AÑA

Ultimo añanan e islanan autonomo a haya problema cu Den Haag riba e.o. finanzas publico y e screening di candidatonan pa minister. Na 2014 ex minister Mike Eman a bay den welga di hamber despues cu gobierno di Reino a dicidi cu Aruba no por a aproba su propio presupuesto. E palabracion pa un geschillenregeling ta riba agenda durante 20 aña caba. E tempo ey na 1993, Aruba a palabra cu ex minister Ruud Lubbers cu lo a bin un geschillenregeling. E presion riba Hulanda a aumenta ora cu Corsou y St Maarten tambe a bira autonomo na 2010. Raad van State kier pa gabinete Hulandes haci lihe cu e asunto. Esaki pasobra e relacion entre Hulanda y islanan no a mehora. “Cada bes ta surgi disputa despues di cual e combersacion ta pega” e rapport di 2017 a bisa.

Fuente: Caribisch Netwerk , autor John Samson