Fitch ta sugeri gobierno tuma mas medida structura

ORANJESTAD – Siguiendo e patronchi di otro añanan y kedando den liña cu recomendacionan anterior, un biaha mas e sugerencia pa Aruba tuma mas medida, ta bira e 'conseho' pa e gobierno. Aunke gobierno a cambia, e recomendacion ta sigui riba e mesun liña conservativo, cu hasta e colegio di supervision financiero CAFT a recomenda Aruba recientemente. "Gobierno di Aruba mester tuma mas medida cu ta encera impuesto structura of un medida ahusta di gasto pa por sostene e consolidacion na 2019" e agencia ta bisa den su rapport emiti diaranson merdia. Gobierno di Aruba mientrastanto (manera ta custumber) a presenta e rapport den un forma postiivo, argumentando cu envez di degrada Aruba, a mantene e rating anterior.   Esaki a resulta den debe gubernamental mas halto y a aumenta e retonan di Aruba pa logra un consolidacion financiero sostenible. Asina e agencia di acreditacion a bisa den su rapport publica diaranson. Adicional, segun Fitch ta premira un crecemento menos grandi compara cu expectativanan anterior, debi parcialmente na e retraso den reapertura di e refineria. Mientras cu esey enberdad ta un logro segun Fitch, nan ta papia di e  perspectiva negativo tambe, cu ta refleha un desviacion substancial di objetivonan fiscal anterior. Diferencia cu gobierno anterior ta cu e gobierno aki si a haci mencion tambe di e parti negativo (aunke breve) den su presentacion diaranson.

NO CUMPLIMENTO

E asunto di no cumplimento di e norma stipula segun ley di Laft, tambe a hunga un rol grandi segun Fitch. E ta mina e credibilidad di e politica fiscal. E ta sigui relata e aumento barbaro di debe acumula. Aunke cu Hulanda ta sostene Aruba den loke ta presupuesto y ayudo cu prestamo externo, ta keda un risico, basa riba e parti di plan di consolidacion cu ta basa riba cortamento di gasto y aumenta entrada via impuesto usando mas eficiencia.

MAS MEDIDA

Ta sigui haci mencion di e crisisheffing, pero mes momento ta papia cu posiblemente mester aumenta mas medida cu ta encera impuesto structura of un medida ahusta di gasto pa por sostene e consolidacion na 2019, segun Fitch.

POSITIVO

Practicamente e unico punto positivo ta e pilar turistico cu ta yudando Aruba sali poco di e problema financiero. Tambe ta sigui subraya e importancia di ta den e status cu nos ta cu Hulanda, cu ta duna Fitch un confianza cu Hulanda lo sostene nos isla, pues cu na fin, Hulanda lo ‘rescata’ Aruba si mester. Lesa e rapport AKI.