Abogado: Gobierno no kier paga compania pa trabou di Caya Grandi

ORANJESTAD – Gobierno no kier paga e compania constructor responsabel pa e ‘renobacion’ di Caya Grandi, esta e compania Mantbraca. Asina abogado pa e compania Zuhaila Arends Marchena a confirma e siman aki pa NoticiaCla. “E position di Land Aruba ta cu Mantbraca no a caba e proyecto na tempo y e boetnan a acomula dus cu (gobierno ta haya cu) no mester paga” Arends a bisa. Esey a conduci cu a hiba gobierno corte.

APELACION

Mientrastanto e caso ta den apelacion segun Arends. E intencion pues ta pa “Mantbraca logra cobra e trabaonan haci den caya grandi”. No ta conoci ki tempo e caso aki lo bin dilanti. Problema ta cu manera cu e portal aki a raporta caba, tanten cu e caso aki ta den tratamento, gobierno no por haci nada riba e intencion di habri caya grandi pa trafico di motor atrobe. Asina e mandatario responsabel pa infrastructura, esta Otmar Oduber a confirma pa e portal aki. Cualkier paso cu tuma, por ta den desventaha pa e gobierno, cu por conduci na multa cu lo tin cu paga e compania constructura. Intento pa comunica cu director di DOW no tabata exitoso ainda.