AME 2018: Europa ta un mercado stabil pa Aruba su turismo

ORANJESTAD – Europa ta un mercado stabil pa Aruba su turismo. Esaki ta un di e puntonan cardinal cu a bin dilanti durante e conferencia di America Meets Europe 2018 riba e prome dia.

Diamars mainta a tuma luga e segundo parti di e apertura oficial di e conferencia Aruba Meets Europe (AME) 2018. Tabatin interes grandi di e participantenan internacional como tambe esnan local pa loke e mercado Europeo ta trece y loke ta e plannan pa futuro.

Minister Presidente di Aruba Evelyn Wever tabata presente y a subraya e importancia cu Turismo tin pa Aruba, indicando cu esaki ta representa 86.5% di contribucion na Aruba su GDP y 87% di contribucion na empleo total di Aruba. Tambe a gradici tur socio pa nan compromiso pa cu Aruba, su turismo y su comunidad.

CEO di ATA, Ronella Tjin Asjoe-Croes a ilustra e importancia di Europa pa Aruba den cifras. A indica entre otro cu Europa ta un mercado stabil pa Aruba representando a base consistente 8% di Aruba su total di bishitante ‘stay-over’. A comparti cu esaki a subi cu 5% na 2017 y cu pa prome’ kwartaal di 2018 e mercado Europeo a subi cu 6%. A sigui bisa cu locual ta haci bishita di e Europeo interesante, pues di e mas di 90 mil bishitante, ta e hecho cu e averahe di estadia ta uno mas largo (11 anochi) cu ta permiti e bishitantenan pa laga mas atras den nos economia. A subraya pa medio di presentacionnan con imperativo ta pa semper tuma e dinamismo di turismo na cuenta. Na A.T.A. trendnan global di e biahero/biahe ta wordo monitorea continuamente pa cu su impacto riba e industria di turismo. Hecho ta cu turismo ta sigui briya como un di e streyanan mas fuerte den un mundo mundial insigur. Pa tal motibo, hunto nos mester ta prepara y tuma accion pa salbaguardia e desaroyo sostenibel di e industria aki.

CEO di AHATA Jim Hepple a comparti desaroyonan clave den e sector hotelero y otronan, cu esnan presente. Mientras cu director di aeropuerto James Fazio a pasa den e proyecto di aeropuerto, esta ‘Beatrix 2030’.

Sanju Luidens-Daryanani (ATA) hunto cu Tirso Tromp a elabora riba un campaña nobo pa Aruba cu lo lansa den e di tres kwartaal di e aña aki. E campaña ta pone e hende di Aruba central y ta conta locual Aruba ta significa y ofrece pa medio di e personahenan aki den nos comunidad. Riba e potretnan por mira e oradornan como tambe invitado y participantenan durante e apertura oficial di AME 2018.