Wever: Departamentonan di SVB no ta muda mas pa Arulex Building

ORANJESTAD – E deal pa muda varios departamento di SVB den e edificio di Arulex, a keda cancela. Minister di Salud, responsabel pa e departamento aki, esta Dangui Oduber, a confirma esaki pa NoticiaCla diamars atardi. Parti di esaki ta riba instruccion di prome minister Evelyn Wever Croes. E deal di e mudamento pa e edificio na Arulex a crea basta conmocion, mirando cu ta trata di un edificio di cual tata di prome minister Evelyn Wever Croes ta parcialmente doño. Den cuadro di e informacionnan cu a sali cu no tin placa pa traha un centro multifuncional pa San Nicolas (MFA), a cuestiona cu pakico si tin placa pa paga huur na edificio di familiar di prome minister. Y pa evita cualkier indicacion cu tin faboritismo, Wever Croes a confirma pa e portal aki cu a instrui pa para e deal.

PERSECUCION FAMILIAR

E asunto di huur di SVB ta cay den e eterno acusacion politico cu pa añanan largo ta persigui famia Croes, esta supuesto faboritismo pa huur den edificio familiar, manera den e caso aki Arulex building. Por corda cu e ta algo cu e gobierno aki a sigura durante campaña y despues den gobernacion, cu e no kier ta tilda cune mas. Den cuadro di esaki, NoticiaCla a bay averigua un ke otro y a resulta cu enberdad SVB tabatin intencion di muda cierto departamentonan den e edificio di Arulex na Eagle. De hecho, e motibo duna segun SVB, ta cu e ta e unico edificio cu ta cumpli cu locual cu nan mester, esta pa loke ta trata entre otro e prijs, e espacio y pa loke ta trata facilidad di parkeer. Pero pa evita cu esaki bira un discusion politico di semper, Wever Croes a confirma pa e portal aki, cu a instrui esnan encarga pa cambia esaki (e deal) no obstante e ta e miho deal, y pa no uza e edificio particular aki. Asina e ta cumpli tambe cu e promesa pa nan no por wordo liga na ningun asunto familiar, manera cu a tilda nan di semper. Algo cu a sosode tambe, manera cu Oduber despues a confirma na e portal aki.

SVB LIBER

Segun Oduber, e mandatario encarga cu e banco di seguro social, SVB tabata liber den su decision pa busca un localidad otro pa acomoda diferente departamento cu tabata den e ex edificio di BGD cu a wordo desaproba (afgekeurd). “ En todo caso awor aki SVB ta en busca di un localidad cu ta cumpli cu tur e rekisitonan stipula pa SVB” Oduber a finalisa bisando.