Minister di Labor a kita cierto autoridad di director di DAO

ORANJESTAD – Director di Directie Arbeid en Onderzoek (DAO) a perde su autoridad pa duna permiso pa e.o. uitzendbureau. E unico aworaki autoriza pa duna tal permiso, ta e minister di Labor mes. Asina e minister responsabel pa e departamento, Glenbert Croes a bisa e siman aki durante un conferencia di prensa. Segun e mandatario DAO a actua liña recta contra un decision di dje. E mandatario tabata basta indigna bisando cu ‘mi tin un problema hopi grandi cu mi departamento di labor y investigacion riba e tema di uitzendbureau”. E problema ta cu den e ultimo 3 lunanan e DAO a duna 6 permiso pa uitzendbureau sin conocemento di e mandatario, siendo cu tin un paro riba esaki, y sin su aprobacion.

ELIMINA ABUSO

E mandatario a mustra cu e kier elimina e fenomeno di abuso di trahadonan cu e practica di uitzendbureau. Y asina mes DAO a actua contra esaki, sin conocemento di e mandatario. Segun e mandatario desde cu e leynan nobo a keda aproba na 2013 bou di gobierno di AVP, a otorga 28 permiso pa uitzendbureau, cu ta un periodo di 3 aña. E mandatario ta indica cu e acto nobo di e ultimo 3 luna ta haci intencionalmente. A informa esun concerni, cu e ta un violacion di su confianza cu mester tin entre e departamento y su minister.

CONSECUENCIA

E mandatario a bisa cu e acto aki tin consecuencia pa tanto e director, e departamento y esnan cu a haya e permisonan aki. A compronde mientrastanto cu 2 di e 6 permisonan, ta prolongacion pues no por haci mucho cu esey, pero e otro 4 por considera nan cla pa revocacion. Pero un investigacion andando lo tin cu determina e actuacion definitivo. “Ta mi intencion di revoca mayoria di nan “ Croes a bisa.