E pakico Corsou si ta ricibi bapornan di Venezuela, y Aruba no

ORANJESTAD/WILLEMSTAD – E motibo cu Corsou si ta laga barconan di p.e fruta of berdura drenta nan isla, ta pasobra conseho di minister di e isla siman pasa a autoriza esey. Na Aruba e gobierno local no a tuma e decision ey ainda. Esey ta e diferencia, manera cu NoticiaCla a compronde di su fuentenan na Corsou. Ayera prome minister di Aruba Evelyn Wever a confirma pa e portal aki cu berdad no ta permiti barconan di Venezuela drenta Aruba ainda. E motibo duna ta cu nan mester reuni y clarifica e tipo di control cu mester tene. Ta premira cu pa otro siman esaki keda regla. Mientrastanto Corsou a ricibi varios barco e siman aki caba, procedente di un waf di Coro, Venezuela. Potret ta cortesia di Getty images, di e situacion antes cu a cera e frontera y ora cu Corsou tabata permiti e mercado di boto na waf. Esaki no ta permiti mas.