Aruba ainda no ta ricibi barconan di Venezuela, pero Corsou si

ORANJESTAD/CARACAS/WILLEMSTAD – Tin un diferencia con Corsou y Aruba ta manehando trafico maritimo for di Venezuela actualmente. Mientras cu Aruba ainda ta prohibi bapornan di Venezuela, Corsou si a cuminsa ricibi nan prome barconan. Ora cu NoticiaCla a puntra pakico tin e diferencia aki, prome minister di Aruba Evelyn Wever a bisa cu pasobra aki e situacion ta diferente. Mas e clarificacion e mandatario no por a duna, cu solamente cu ta wardando Venezuela determina kico exactamente nan kier pa cue control. Awe mainta e prome barco di fruta a yega Corsou y ta spera cu mayan e prome di berdura tambe yega. Solamente cu nan no por para mas na e caminda di custumber. 

TRAFICO NORMAL?

E hecho cu mientrastanto Venezuela a opta pa habri solamente un aeropuerto y un waf pa trafico maritimo y aereo continua entre Venezuela y islanan ABC, ta asuntonan netamente interno di Venezuela. Asina Wever Croes a sigui bisa e portal aki dialuna mainta. “Nan a tuma e decision ki pasobra nan no tin suficiente hende pa haci e control cu nan kier pa wordo haci” Wever Croes a bisa.

TILDA

Segun Wever, ta Aruba a wordo tilda y acusa pa gobierno di Venezuela cu ta acepta importacion di productonan sin cu Aruba ta haci e control. “Nos a bisa nan, ma shon ta abo tin cu controla kico ta sali for di bo pais. A nos ta dispuesto pa haci un di dos control, pero abo tin cu hacie prome” Wever Croes a bisa. Como tal Venezuela a dicidi cu nan kier haci e control y como tal a pone 1 aeropuerto y 1 waf disponibel.

CONFUSION AEREO

Segun Wever, mientras cu tin solamente un aeropuerto habri pero e ta papia di cu e coneccion aereo ta restableci pero esun maritimo no (siendo cu tin un puerto habri), ta pasobra awor tin sikiera avion cu por sali for di Venezuela. “Cu boto, bo no por sali for di Venezuela, y drenta Aruba ainda. Esey ta e diferencia. Awor si bin un bapor di fruta (di Venezuela), e no ta wordo acepta pa drenta, tanten cu no tin palabracion haci riba e certificado di origen, cu tin cu wordo exigi akinan. As we speak, botonan no ta yegando, avionnan si ta yegando” Wever a bisa. Aki el a admiti ponencia di e portal aki cu no a restablece contacto aereo completamente, pero e no sa si esey lo pasa door di cu eseynan ta asuntonan interno di Venezuela.

DELEGACION

Mientrastanto Wever Croes a bisa e portal aki cu a prepara e delegacion di Aruba pa siman pasa diahuebs caba ta na Corsou, pero e no a sigui pasobra Venezuela no tabata cla. “Nos ta den un situacion cu ta den desaroyo” Wever a finalisa bisando. Foto cortesia Dick Drayer, Curacao.