Caso den corte ta stroba decision pa habri Caya Grandi pa trafico

ORANJESTAD – E decision si ta habri Caya Grandi (Caya Libertador Betico Croes) na Playa bek pa trafico di motor (auto), lo tin cu warda un (bon) rato. Asina minister di infrastructura Otmar Oduber a bisa NoticiaCla dialuna durante un conferencia di prensa. E motibo ta cu tin casonan den corte di e compania responsible pa e trabaonan haci, esta Mantbraca, cu ta stroba gobierno di actua riba e tema. “Gobierno di Aruba no por bay contra di loke e tempo ey a wordo palabra di cu ta cu trafico no por pasa den Caya Grandi”, Oduber a bisa. Di parti di e compania Mantbraca, e abogado di e compania a confirma pa NoticiaCla cu 'enberdad tin un caso andando den corte di apelacion contra land Aruba pa logra cobra e trabounan haci den Caya Grandi. 

CERA CAYA PA 12 ORA

“Mei mei di tur e promesanan cu tabatin di e gobierno anterior biaha pasa, pa 12 hora y a cer’e bek, tabata netamente pa e motibo aki” Oduber a bisa. Como tal mester warda en todo caso e caso cu ta den corte termina. “E ta topico di deliberacion di gabinete pa wak kico lo bay sosode den futuro”.

INVESTIGACION

Por corda cu gobierno na inicio di aña a bisa cu un comision lo tin cu averigua e posibilidad si ta habri caya of no, y lo tuma tres luna pa haci tal. A compronde di e mandatario cu ta durante e periodo aki a bin haya sa di e situacion ey, cu ta nifica cu lo dura un periodo no defini durante cual mester simplemente warda y cu no por tuma decision.

CLAIM MIYONARIO

E mandatario a confirma pa e portal aki cu gobierno a wordo notifica den e caso aki door di DOW y huristanan cu no ta cumbiniente e momento aki tanten e caso no termina. Tin un claim y un garantia na Banco Central di fondonan cu ta riba 3 miyon florin, cu gobierno di Aruba por perde si en caso no cumpli cu e condicionnan cu a wordo poni di e temponan ey, p.e e hecho cu no por tin trafico den caya. “Nos lo kier prefera di warda e ora e resultado den corte pa e ora por defini kico ta bay haci den futuro pa loke ta trafico si of no den Caya Grandi”, Oduber a finaliza bisando.