Crisisheffing ta vigente te ora keda cla cu reforma fiscal

ORANJESTAD – E intencion ta pa e crisisheffing ta na vigor tanten cu gobierno no yega na e reforma fiscal necesario. Esaki por dura te cu fin di aña aki of mas tarda te fin di 2019. Asina prome minister Evelyn Wever a sigura NoticiaCla dialuna mainta. A cuminsa traha riba e reforma fiscal caba, aunke no por a bisa den ki forma esaki lo mester bira. “Mi no por duna un garantia cu e ta keda cla pa fin di aña, pasobra tin cosnan cu ta tuma mas tempo den gobierno pa bo logra” Wever Croes a sigui bisa.

CAFT

E pregunta a bin a raiz di un rapport di e colegio di supervision financiero di Aruba (CAFT) cu a bisa cu ta mira cu e crisisheffing lo por keda na vigor te 2020, pasobra ta pa e tempo ey e reforma fiscal lo por reemplaza e fondonan cu e crisisheffing lo genera. Wever Croes a tuma nota di e declaracion ey, pero no ta para ariba cu esey lo ta un hecho. A mustra cu CAFT no tin ningun autoridad pa papia despues di 2018, pasobra segun e ley cu ta duna CAFT poder, e LAFT, e ta vence na final di e aña aki. Wever a mustra cu e comentario di CAFT riba e tema no tabata un recomendacion sino un comentario. “E por tin di haber cu e hecho cu nan no ta full informa riba e plan financiero” Wever a finaliza bisando.