Wever: Lamentablemente no tin placa awor pa MFA San Nicolas

ORANJESTAD – No tin placa awor pa e di 5 centro multifuncional, conoci como MFA pa San Nicolas. Asina minister president Evelyn Wever Croes a bisa NoticiaCla durante un conferencia di prensa dialuna mainta. E reaccion ta a base di pregunta di e portal aki unda cu parlamentario pa partido POR a exigi di gobierno (den su lista di pregunta pa presupuesto) pa bin cu e MFA pa San Nicolas tambe. E hecho cu un parlamentario di e partido cu ta forma parti di e coalicion ta exigi algo asina, ta loke a hala atencion. Segun Wever Croes, lo bay investiga kico por haci ainda pa toch logra un tipo di MFA modifica, ya cu e gabinete anterior a usa e placa destina pa e di 5 MFA, na algo otro. Algo cu e prome mandatario ta condena.

PREGUNTA

Segun Wever, el a admiti cu el a ricibi e pregunta di parlamentario Alan Howell riba e tema. Wever a admiti cu e no tabata na altura di e situacion di e MFA. “ San Nicolas no a cuminsa, y no a resta placa” Wever a sigui bisa e portal aki, como parti di contesta delanta riba e pregunta. MFA # 4 ta esun di Santa Cruz cu ta atrasa pero cu lo keda cla e aña aki. “E ta un situacion hopi fastioso” Wever a bisa. Esaki pasobra semper a priminti San Nicolas atrobe sin cu por a cumpli cune. Tur esaki mientras cu a cera deal pa 5 MFA, pero ta paga huur pa 5 pa 20 aña siendo cu tin solamente 4. Wever a admiti cu si no ta pa e pregunta di Howel, lo e no tabata sa di e informacion di MFA. Lo bay purba wak si por adapta un edificio di gobierno na San Nicolas y hacie un forma toch di MFA, y wak si por uza placa disponibel. Na caminda a bin compronde cu e intencion no tabata pa bin cu un MFA completamente nobo, sino uno adapta y renoba un edificio existente.