Cantidad di plachi di auto 2018 no paga ainda ta preocupante

ORANJESTAD – E cantidad di number di auto (plachi di number) no paga ainda pa 2018 ta preocupante. Asina vocero di departamento di impuesto Meverly Romano a bisa durante conferencia di prensa dialuna. E prome fecha a vence dia 31 di januari y ainda tin 21% di comunidad cu no a cumpli. Esey pa e departamento ta preocupante, mirando cu e lunanan a pasa caba y e di dos fecha (30 di juni) ta yega djis aki. Mes momento ta elogia e 79% cu si a cumpli, y cu ta mustra nan sentido di responsabilidad.

SPECIFICACION

Pa loke ta e detayes di esnan cu no a cumpli ainda, a mustra cu den categoria di plachi A, tin 14.523 automobilista cu no a cumpli di belasting. Esey ta 21%. E ta un cantidad considerable segun Romano. “Nos ta na mitar di April, y e fecha final a pasa algun luna pasa y ainda no a paga e belasting y ta coriendo cu auto sin impuesto”. Otro categoria ta 1131 number di diesel truck di cual 83 no tin nada paga. Otro grupo ta esun di motorcycle (2156 registra 608 cu no a paga e impuesto pa 2018, cu ta 28% den e categoria aki, tambe ta considerable. Un otro categoria ta brommer di huur, cu ta 48 cu no a paga ainda cu ta 20%. E categoria personalisa (plachi cu tin nomber combina cu number y letter) ta mira cu tin un total di 530 di cual 143 no a paga, representando 27% cu no a paga. Otro categoria ta V car , 791 no tin belasting paga, 18%. Di e 451 taxinan registra, 57 taxi no a paga nada pa 2018. Mesun cos pa bus B, unda cu tin 24 cu no ta paga. Na tur, 16.556 cliente no a paga e plachi di 2018, manera mester ta. Esey ta 21%. E ta un cantidad hopi halto pa no a paga nada ainda di 2018. A pidi cu si no ta uza e number, trece e plachi bek. Plachi cu a wordo horta, ta pidi pa haci denuncia na polis pa por cambia e plachi.

NAHEFFING

Di dos mitar di 2018, dept di impuesto ta cuminsa saca e naheffing aanslagen. Den pasado esey no tabata sosode, pasobra e ley no tabata permiti esey. Pero entrante 2017 e ley a cambia y e sistema di belasting a cambia cu ta haci posibel cu por saca e cobranza pa esnan cu no a paga. Ta saca esaki den e di dos parti ora cu e fecha final vence (30 di juni).