Abogado: Danki na Panama Papers a gara ex trahado di Setar

MIAMI/ORANJESTAD – Si no ta pa e ‘famoso’ Panama Papers di dos aña pasa, ainda e ex trahado di Setar E. Koolman lo ta ocupa cu su schema illegal di gana placa. Asina abogado Mericano pa e compania local di telecomunicacion Setar Benton Curtis, a bisa recientemente. Mas informacion ta circulando den prensa Mericano riba e tema, despues cu diabierna ultimo Koolman a admiti culpabilidad den e caso di labamento di placa di miyones di dollar mientras cu e tabata bende y negosha cu hopi compania di telefon celular mericano. Entre nan un raportahe di Miami Herald. 

OPERACION

Segun un raportahe den e matutino Miami Herald, Koolman a gana 1.3 miyon dollar den soborno, pa maneha contractonan di celular di gobierno balora na 45 miyon dollar na 10 compania na Miami y otro caminda. Algun di e telefonan tabata segunda mano y infecta cu programanan pornografico.  

CASTIGO

Si haya Koolman culpabel pa su actonan, e por sinta 8 aña den prison pa su envolvimento di labamento di placa y conspiracion aplica, pero por ricibi menos aña di castigo si e coopera cu informacion valioso na autoridad Mericano. Esaki pasobra ta trata di un schema gigantesco di corupcion entre Sur di Florida pa Aruba.

PANAMA PAPERS

Ta te na 2016 cu e informacion di su nomber a aparece den Panama Papers, cu a descubri su ‘actonan fraudulento’. Tabata e ora cu e compania pa cual Koolman tabata traha pe ainda, esta Setar, a bin descubri e informacion.

TRANSACCION

Segun e relato, un comerciante di Miami a usa cuentanan bancario y tarjetanan di banco pa paga Koolman $ 705 mil dollar na soborno a cambio di contractonan pa telefonan celular pa Setar, balora na $23.8 miyon dollar. Despues cu Setar a kita Koolman for di trabou, a demande na Miami aña pasa, acusando e di dirigiendo e sobordo di otro persona y otro comerciantenan pa medio di su cuenta bancario exterio (offshore) y cuentanan bancario na Panama. El agasta e placa na entre otro renobacion di su cas na Aruba, incluyendo reparacion na piscina y panel solar. Otro fondo a wordo usa pa cumpra un pick up pa su yiu, huur y otro gastonan pa su by-side. E caso no ta solamente pa haya Koolman paga e gastonan bek, sino tambe su ex casa y tur compania cu tabata envolvi.

ABOGADO

E abogado pa Setar na Merca, Benton Curtis a declara cu increiblemente si no tabata pa e Panama Papers, e conducta ilicito nunca lo a wordo descubri. 

Fuente di informacion cortesia di  www.Miami Herald.com