DEN HAAG/ORANJESTAD – Si Aruba haya gas of petroleo den su subsuelo, e placa cu keda genera, mester wordo uza pa paga debe pendiente. Asina parlamentario Hulandes pa VVD (gobierno na mando na Hulanda) esta Andre Bosman ta pensa. E ta relaciona su informacion basa riba informacion di kico Aruba lo mester haci cu e placa. Un discusion cu tabata den prensa recientemente na Aruba.
ARTICULO
Recientemente un articulo a keda publica den tanto NoticiaCla como Amigoe di Aruba, cu ta relata na e noticia cu proximamente ta bay bora atrobe (juni of juli) pa wak si tin petroleo of gas den e subsuelo. NoticiaCla a trata e tema den e angulo cu e ekipo tabata cla pa move pa Aruba for di Africa, y cu den algun luna e ta cla pa cuminsa cu su trabou pa cual e la wordo contrata na Aruba. Di parti di Amigoe, ta relata riba e tema di deficit di presupuesto y creacion di fondo di e placa cu por genera di e hayazgo di petroleo of gas.
PREGUNTA
Den un serie di pregunta manda na e secretario di estado Hulandes pa asuntonan di Reino, Raymond Knops recientemente, Bosman ta puntra si e ta comparti e pensamento cu e presupuesto mester wordo completa prome y cu e deficit presupuestario mester wordo reduci, prome cu por pensa pa bin cu un fondo pa otro meta, cu no ta pa reduci e deficit.
REACCION
Den un reaccion pa e portal aki, e politico Hulandes brevemente a bisa “mi ta simplemente haya cu mester uza e placa aki pa paga debenan pendiente”, esta pa no uza e placa aki pa nada otro cu esey prome.
DEN HAAG – Directora di Arubahuis a mr. Joselin Croes a participa na e “Kennismissie” di Minister di OC&W Robbert Dijkgraaf na Curaçao y Aruba. Na Aruba e punto central tabata con educacion ta conecta cu e mercado laboral: e situacion actual, pero principalmente con e demanda di enseñansa ta cuadra cu e necesidad di e mercado laboral.
AMSTERDAM – Rey di Spaña Felipe y Reina Letizia a cuminsa na nan bishita oficial di dos dia na Hulanda. E bishita a cuminsa riba plaza Dam unda cu tabatin tiro di saludo riba e tereno di marina. No a usa municion sino mas bien blanco. E diferencia di e bishita aki ta cu e biaha aki prinses Amalia tambe ta inclui den e bishita. Awe nochi e ta forma parti di e cena Real na honor di e pareha Real Spaño. Amalia tin un relacion special cu Spaña ya cu e la pasa un aña eynan recien debi na motibonan di seguridad pa su bida. Mientrastanto e la bolbe Hulanda pa biba y sigui studia. Pero e situacion di seguridad y menasa contra dje, no a kita ainda.
SCHIPHOL – Decenas di buelo a keda anula dialuna na aeropuerto Schiphol di Hulanda debi na mal tempo. Ta primordialmente buelonan dentro di Europa mes. Buelonan pa Caribe Hulandes manera Aruba no a keda afecta. Ta trata di 90 buelo cu a keda anula, di cual mayoria ta di KLM. Ta spera rafaga di biento fuerte cu posibel mal tempo, segun un vocero di e aeropuerto.
W’STAD/DEN HAAG - Minister Hulandes demishonario di Klima i Energia, Rob Jetten a anunsiá durante un reunion di e komishon fiho di Relashonnan den Reino di parlamento Hulandes ku na 2025 ta organisá e di dos konferensia di klima di reino na Kòrsou. Esaki despues ku e promé konferensia a tuma lugá na mei 2023 na Aruba. El a katalogá e promé konferensia sumamente eksitoso ku partisipashon di diferente pais den region. E ta interesante mirando cu na mei na Aruba Jetten a informa Noticiacla cu e interes pa asuntonan di Clima ta casi nulo, pasobra tin problemanan mas importante cu esey pa atende. Asina mes, ta sigui tene e conferencianan.
DEN HAAG – Negosacionan pa forma gobierno nobo na Hulanda ta continua awe. E lidernan di e 4 partido ta hunto prome biaha cerca e informado. E intencion ta pa logra un acuerdo pa mitar di luna di mei di e aña aki ainda. Pero na final di e combersacion, Geert Wilders di PVV no por a sigura esaki ainda. Partidonan ta hopi positivo pa e progreso, pero ainda no por bisa si ta logra e meta menciona. Algun medio ta bisa cu e combersacionan ta bayendo hopi lento, pero e partidonan ta desmenti esey. E parti financiero ta e parti mas dificil pa atende. Na November di aña pasa tabatin eleccion y a cuminsa negosha. Ya ta bayendo pa 5 luna di formacion.
ORANESTAD - E pasado di sklabitut kolonial di Hulanda i su impakto a forma diferente pais rònt mundu profundamente. Tòg e konosementu ku ta disponibel tokante e pasado di sklabitut kompartí akí ta skirbí partikularmente for di perspektiva kolonial. Pa enrikesé nos perspektiva, minister Dijkgraaf (Enseñansa, Kultura i Siensia) ta inisiá un koperashon global di sientífikonan riba e tópiko akí awe na Aruba. Esei el a anunsiá awe durante un mishon di konosementu den Karibe.