- Wever: Fin di di dos cuartaal 2024, centro di Oranjestad ta haya mas luz
- Banco Central ta mantene e tasa di reserva obligatorio na 22,0 porciento
- DEA: Cabesante y docentenan ta sigui prepara pa introduci Papiamento na scolnan basico
- A.T.A.: Por Mira Documentario Blue Lizard Effect via nos Planta Nacional TeleAruba
- Corte: Caso ‘Isla di Oro’ ta sigui fin di luna awor, cu mesun huez
Dakota a sufri pa gana Caiquetio cu score minimo di 1-0
ORANJESTAD - E wega entre SV Caiquetio y SV Dakota den siman 16 aki ta un chens pa Dakota subi bek na promer luga riba tabla, apesar cu por ta temporario, wardando resultadonan di Estrella y Nacional den nan weganan pendiente di e jornada 16. Caiquetio ta casi sigur den e play-off di promocion-degradacion ta biniendo di un contundente victoria riba Riverplate den siman 15, ta hungando pa honor pero tambe pa preparacion pa logra keda den division di honor pa e siguiente temporada.
Dakota ta cuminsa e wega di biaha den atake di hopi velocidad, Caiquetio su strategia ta di sinta warda defende bon y hasta ocasionalmente press Dakota un poco mas ariba, tratando di desekilibra nan wega, ocasionalmente ataka tambe. Tin biaha dominio di bala y hasta control di wega no ta sificiente pa gana un wega. Dakota tabatin tur esey, toch e gol no a yega pa basta largo, y ora un gol no ta yega tin biaha sin pasenshi frustracion sa drenta sin cu bo kier. Caiquetio su tactica tabata “spot on”, Dakota cu bala y iniciativa pero sin yegada di calidad, ni peligroso. Mester remarka cu e Dakota actual no ta mesun Dakota di e prome mita di e temporada actual, nos sa cu e ekipo tabata solido na cuminsamento di temporada, nan tabata score hopi mas gol te cu e punto ey y solido den prome lugar, nan golnan a somenta, e average di gol pa wega ta awor 1.42 vs 2.40 den e prome round di temporada, un caida significante. E perdida di Jesus Peñate a hasi tal impacto? paso toch Peñate no tabata score hopi gol, pero nos por deduci si cu Peñate lo tabata crea hopi mas yegada y chens pa su oncena, esey falta awo actualmente pa e Dakoteronan y pa nan aspiracion pa gana un campeonato. Halftime a bay aden sin gol, un tremendo logro te na e punto ey pa Caiquetio y mas frustracion pa e ‘geel cu pretonan’.
E di dos tempo a cuminsa sorpresivamente cu Caiquetio den atake y peligroso tambe pa colmo, un ekipo mentalmente renoba y dicidi pa competi cuerpo a cuerpo cu cualke ekipo. Asina a cuminsa un ‘toma y dame’ entre e dos contrincantenan, Caiquetio a defende hopi bon y tin biaha hasta a bay den atake si nan a mira e chens. Un Dakota cada biaha mas nervioso y sin precision husto pa via di e tactica di Caiquetio. Dakota a hasi algun cambio tambe en busca di solucion, despues por a wak si cu Dakota a cuminsa organisa nan mes mihor cu mihor pasenan for di minuut 65 n’ey. Cu miho yegadanan e chens nan di Dakota a mehora, pero, di gol nada ainda. Toch tabatin un milager chikito ainda pa Dakota, un penalty na minuut 73, sin duda algun bon cobra pa e referee ne momento ey. Ricky Hodge a tira e penalty y pase na banda di e portero di Caiquetio pa e gol di bentaha. E wega a sigui na mesun ritmo pa un paar di minuut mas, Caiquetio purbando di empata e wega tambe, un bon prestacion di e ekipo di Paradera. E ultimo 10 pa 15 minuut di e contienda aki si nos por bisa cu cos a bay hopi for di man riba veld cu accion nan anti-futbol, e hungado nan a perde disciplina, tabatin hugadanan duidelijk di carchi, ta parce cu algun hungado, especialmente di Dakota, tabata busca intencionalmente pa haya carchi, momentonan scur y dudoso cu ta perhudica nos futbol, referee cu a trata di hasi lo miho posibel pero toch a perde control di e wega y autoridad riba veld, pero tambe mester awo revisa e reglanan di disciplina y procedimiento di con ta trata cu acumulacion di caarchinan. Apesar cu a anuncia 5 minuut di tempo extra despues di e 90 minuut reglamentario, a hunga solamente 2 di eseynan, dus, wega a caba prome cu tempo tambe pa colmo, disgustando e ekipo di Caiquetio y su fanaticadan, paso, nan tabata ainda cu chens pa empata e wega, “Quo Vadis” futbol Arubano??
Resultado final Dakota 1 Caiquetio 0. Ricky Hodge ta nos ‘man of the match’. Dakota asina ta temporariamente na prome luga cu 35 punto, Caiquetio cu 8 punto oficialmente ta evita degradacion automatico y ta bay hunga play-off di promocion-degradacion na final di temporada.
Rafael Nadal: Mi ta considera esaki como mi ultimo aña (hungando tennis professional)
BARCELONA – E strea internacional di tennis professional Rafael Nadal a anuncia cu esaki ta su ultimo aña professional. “ Mi ta considera esaki como mi ultimo aña y mi kier disfruta di cada momento” Nadal a bisa dialuna durante un conferencia di prensa na Barcelona. E la anuncia su participacion diamars awor na e torneo ATP na Barcelona. Ta su prome participacion despues di a retira tres luna pasa di e torneo na Australia. E ganador di 22 titulo grandslam, a dicidi ultimo momento pa participa e siman aki. E tenista di 37 aña di edad mester a sacrifica varios torneo debi na su condicion fisico cu no tabata optimal. Ultimo tempo e ta sufriendo di basta lesion y a indica aña pasa caba cu esaki por ta su ultio aña. Awe e la confirma cu esaki enberdad ta su ultimo aña hungando tennis professional.
Cantidad record di persona ta den Ronde van Aruba awe
SAVANETA – Un cantidad record di persona ta den Ronde van Aruba (RVA) awe. Segun informacion di e portal 297Sports, un total di 726 coredor ta subi caminda, cual por cierto ta un record. Tur e lunanan di preparacion lo keda demostra awe riba caminda unda e demas participantenan lo duna un show di coremento riba e careteranan di nos dushi isla di Aruba. Lo tin un total di 16 coredor single e aña aki, 57 duo teams cual ta e cantidad mas grandi den historia di RVA. Por ultimo e 149 estafette lo ta den e gruponan di 4 relay, pues 596 persona lo core e 72km rond di nos isla. E fiebre di Ronde van Aruba ya a wordo sinti y lo bay ta grandi awe full rond di nos isla cu hopi mirones canto di caminda. Tin varios happening prepara na e diferente post.
Seleccion cu a conkista 54 medaya den Carifta Aquatics Championship 2024 a bolbe Aruba
ORANJESTAD - Diabierna atardi den un esfera ameno, Minister Endy Croes a ricibi nos Seleccion di Landamento y Seleccion di Landamento Artistico den e VIP room di Aeropuerto Internacional Reina Beatrix. Manera ta conoci, siman pasa nos atletanan a competi den Carifta Aquatics Championships 2024 cu a tuma luga na Nassau, Bahamas y Fort Lauderdale, Florida. Carifta ta e competencia di e mihonan di Caribe. E aña aki alrededor di 400 atleta di 21 pais a participa. Famia y amistad tabata ansioso sperando e yegada di nos atletanan. E hobennan a conkista un total di 54 medaya den dos diferente disciplina acuatico: landamento y landamento artistico. Den e disciplina di landamento a logra 30 medaya y landamento artistico 24 medaya. Pais Aruba a keda na di 7 luga den 21 pais. Den nomber di Gobierno di Aruba, Minister Endy Croes a felicita e atletanan cu nan excelente prestacion den Carifta. Alabes, a gradici e atletanan pa carga nomber di Aruba y laga nos pais briya riba plataforma internacional.
Cantidad di hungadornan internacional den baseball Major League na Merca a baha
NEW YORK — E percentahe di hungadornan internacional hungando baseball professional na Merca, a baha te na 27.8% cu ta e nivel di mas abou desde 2016. Aworaki tin 264 hungador di 19 pais, entre e 949 hungadornan activo total ora cu e temporada 2024 a habri siman pasa. E pais internacional cu tin mas hungador na Merca, ta Republica Dominicano cu 108 hungador, sigui pa Venezuela cu 58 sigui pa Cuba cu 18. Corsou tin 4 mientras cu Aruba tin 1 (oficialmente) cu ta Xander Bogaerts. Actualmente e tin un hungador riba ‘standby’ cu Atlanta Braves, esta Chadwick Tromp. Pa loke ta e ekipo cu tin mas hungador internacional, Houston Astros ta lidera e grupo aki cu 16 hungador, sigui pa San Diego cu 15, Boston cu 14, Miami cu 14 y Cleveland cu 12.
Arjan van der Laan ta bira entrenador di seleccion di futbol damas di Aruba
ORANJESTAD – E conocido entrenador Hulandes Arjan van der Laan ta bira e entrenador nobo di ARuba pa e seleccion di futbol damas di Aruba. E ta reemplasa Veron Albertz. Van der Laan tabata entrenador di e seleccion nacional di futbol di damas Hulanda.
Na caminda pa Aruba International Regatta 2024
ORANJESTAD - Aruba International Regatta lo tuma luga riba diabierna 28 di juni te cu 30 di juni na Surfside Beach. Un evento cu sigur hopi amante di lama y di nabegacion ta anticipa, sigui pa dos dia di careda riba diasabra 29 di juni cual lo bira e prome dia, y diadomingo 30 di juni e di dos dia di careda.
Follow NoticiaCla
