Cu cierto inversionnan na caminda, lo por reduci tarifa di coriente atrobe

ORANJESTAD –   Mientras cu prijs di coriente ta aumenta diaranson, tin posibilidad cu unabes cu cierto inversionnan tuma lugar proximamente den cierto sistema, e prijs por baha atrobe di cierto forma. Minister di energia Mike de Meza, acompaña pa tur protagonista di compania di utilidad, a splica diamars cu no tin awa pa laba y cu tabata necesario pa aumenta e tarifa, no awo sino ayera.

Director di WEB, Oslin Boekhoudt a confirma cu WEB ta den cora, pero ‘un poco’. Y riba pregunta di NoticiaCla.com, a mustra cu di berdad no por a warda mas cu aumento di e tarifa di coriente. A wanta esaki pa practicamente 9 luna, pero a yega e momento cu mester a haci algo pa por a remedia e situacion. E problema no tabata asina tanto e aumento di fuel oil di 2 pa 6 dollar, sino e forma di cobransa. Esey a trece WEB den problema cu ta pone cu diaranson awor, tarifa di coriente ta aumenta.