Ex trahado di Setar na Merca a admiti culpabilidad di labamento di placa

MIAMI/ORANJESTAD – Un ex trahado di Setar, e Arubiano E. Koolman na Miami diabierna a admiti culpabilidad pa cargo di labamento di placa. E tabata envolvi den un plan pa tuma placa pa influencia contractonan di telecomunicacion, segun fiscal Mericano a bisa awe. E caso ora cu a bira conoci aña pasa a hala hopi atencion y consternacion na Aruba, y despues na maart di 2017, Setar a demanda Koolman y mas di 20 otro persona y compania   oficialmente na Miami. Entre nan su ex casa y su ex chick, ambos Arubiano.

E CASO

Segun informacion di corte na Merca, Koolman cu tabata biba na Miami, tabata product manager di Setar NV y admiti di a ricibi 1.3 miyon dollar di soborno durante 10 aña, a cambio pa uza su posicion pa duna contractnan di telefon celular. Asina e departamento di husticia Mericano ta bisa.

PLACA

Segun e raportahe, Koolman a ricibi e placa via transferencia di placa di un banco Mericano, den forma efectivo durante reunionnan na Miami y Aruba, y door di saca placa di un cuenta bancario Mericano. Koolman a admiti culpabilidad di un cargo di conspiracion di labamento di placa. E ta poni pa wordo sentencia dia 27 di juni proximo.