Reduccion 50% college geld na Hulanda valido pa Aruba tambe

DEN HAAG/ORANJESTAD – E reduccion di 50 % den estudio (college geld) na universidad nan Hulandes durante e prome aña di estudio, ta aplicable pa studiantenan di Aruba tambe ora cu nan bay Hulanda e aña aki. Asina minister Hulandes di enseñansa Ingrid van Engelshoven a bisa. Unabez cu Eerste y Tweede Kamer aproba e cambio e ley cu ta facilidad e reduccion di ‘college geld’, studiantenan nobo lo tin cu paga mitar so di e tarifa actual den e aña academico 2018-2019. Asina e portal di St Maarten Daily Herald ta raporta.

REDUCCION

Segun e raportahe, gobierno Hulandes a dicidi mas tempran e aña aki cu ta corta e college geld na mitar pa e prome aña academico, pa asina hacie enseñansa avansa mas atractivo. Studiantenan cu kier studia pa docente, ta haya te hasta e prome dos añanan na mitar prijs pa asina motiva mas hende pa studia den e ramo ey.

D66

Miembronan di e partido politico D66 a puntra e mandatario si e descuento lo aplica tambe pa studiantenan di e entidadnan Hulandes BES manera Bonaire, Statia y Saba, si nan cuminsa na augustus proximo. E mandatario a contesta diamars cu e descuento enberdad tambe ta aplica pa nan, pero tambe pa studiantenan di islanan manera St Maarten, Aruba y Corsou.