Gobernador a introduci otro cambio den su maneho

ORANJESTAD – E siman aki invitadonan pa e asina yama ‘Oranjebal’ (recepcion di S.E. Gobernador cu ta conmemora cumpleaños di Su Mahestad Rey Willem Alexander), ta ricibiendo nan invitacion pa medio di email, envez di post na cas. Apenas un aña cu Aruba tin su Gobernador nobo den persona di Alfonso Boekhoudt, por a nota varios cambio notable caba. E prome ta e e.o. cambio di con recepcionan ta wordo teni, forma di Gobernador di presenta su mes y asina tin mas cos.

CAMBIO

E aña aki e gabinete di Gobernador a introduci un otro cambio. E biaha aki den forma di con e invitacion pa su recepcion ta tuma lugar. E biaha aki a opta pa invita pa medio di email, envez di manda invitacion imprimi y entrega te den porta di cas di e invitado.

MOTIBO

E siman aki esnan cu a ricibi e invitacion, a nota e cambio aki caba. Den e invitacion e gabinete ta splica motibonan entre otro pa e cambio. “Gabinete di Gobernador di Aruba a scoge concientemente pa manda e invitacion digital, como un contribucion chikito na reduccion di e peso riba medio ambiente” e invitacion ta cuminsa na bisa. E invitacion ta sugeri tambe pa e invitado presenta e invitacion di un forma digital (usando su telefon) na momento cu e yega e recepcion, como forma di ‘control di admision’. Esaki ta bay hunto cu un forma di legitimitacion.

DIGITAL

Ta keda e opcion tambe pa esnan cu ricibi e mail, print esaki y trece esaki e anochi di e recepcion. Sinembargo pa esnan cu ta kere cu esaki ta netamente bira contradictorio, e portal a compronde cu asina mes, e opcion nobo ta miho. Esaki den forma cu mandando un invitacion pa email y laga e opcion pa imprimi esaki, ainda ta miho cu tin un auto core rond y distribui carchi nan imprimi. A compronde cu e gabinete a bira completamente digital, unda cu tur hende ta registra. Como tal e invitacionnan ta keda genera djis pa medio di primi un boton. Cu esaki e Gabinete no solamente ta keda actualiza cu e tecnologia y e forma pa opera, sino ta contribui tambe pa e medio ambiente. Pa loke ta e reception, esaki lo ta dia 26 di april proximo, mientras cu cumpleaños di e Rey mes ta un dia despues, dia 27 di april.