SAC lo forma parti di organisacion nobo di carnaval SMAC

ORANJESTAD – SAC lo forma parti di e asociacion nobo di carnaval SMAK, pero den un fase transitorio. Esaki ta garantisa e ora cu e organisacion di carnaval 2015 ta keda cla na tempo y cu trabounan ta sigura pa inicia carnaval riba 11 di november proximo. Minister di Cultura Otmar Oduber a participa esaki na NoticiaCla.com diamars atardi despues cu e la reuni cu e gruponan uni y asosacion Musica. SAC sinembargo tin cu acepta esaki ainda, y lo conveni cu gobierno dia 10 di october proximo pa participa nan decision. No ta kere cu SAC lo bay nenga, y unabes cu SAC duna su contesta, lo por sigui cu e preparacionnan. Motibo cu SAC no a participa na e reunion di diamars, pasobra nan tabata kier mas tempo pa analisa e rapport di e comision. Nan a ricibi e rapport apenas un dia, y como tal a haya te otro siman pa  reuni. 

Gobierno ta acepta e consehonan di e comision instala pa sondea e futuro di carnaval integralmente.  Gruponan Uni di Carnaval, gobierno y asosacion Musica a reuni diamars atardi, y a yega na acuerdo riba e ideanan cu e comision a sugeri. Entre nan, cu e miembronan di SAC mester forma parti di e asociacion nobo cu lo haya e nomber SMAC. Otro cambio cu lo bin ta cu MUSICA lo traspasa e organisacion di Calypso y Road March Contest pa e organisacion nobo.