Premier lo intermedia den disputa entre gerencia di Elmar y STA

ORANJESTAD – Prome minister Evelyn Wever a compromete su mes pa intermedia den e problema cu tin entre gerencia di Elmar y sindicato STA. Asina gobierno a informa pa medio di un comunicado diahuebs atardi. E prome minister a topa cu e sindicato den cuadro di informa nan riba e.o. e situacion financiero di gobierno. Punto di salida di Wever Croes pa su compromiso, ta cu ta cu segun e prome mandatario, tur sindicato cu gana un referendum na forma legitimo mester wordo reconoci.

INSTABILIDAD

Segun e comunicado, e sindicato su presidente Diego de Cuba a enfatisa cu e instabilidad y malcontento na Elmar contra e director di Elmar ta hopi grandi. Esaki principalmente debi na e hecho cu e gerencia di Elmar no ta reconoce e Sindicato STA. Aki ta pues unda cu Wever Croes a mustra cu esey no por, y cu e lo intermedia. No a duna fecha si ki tempo esaki lo sosode y den ki forma, mirando cu tin un mediador di gobierno cu ta envolvi den e disputa caba, na nomber di gobierno.

CABEZ

No ta awor e disputa ta andando, sino pa basta tempo unda cu De Cuba na varios occasion a laga sa cu e ta pidi cabez di e director di Elmar pasobra e director no ta haci su trabou corecto y no ta capacita pa e trabou. Gremio comercial ATIA e siman aki pa medio di nan comunicado, a expresa nan preocupacion pa cu e situacion cu a surgi, unda cu un sindicato ta pidi cabez di un director.