No ta chines so no por bende cierto producto den nan supermercado

ORANJESTAD – No ta e grupo di Chinesnan cu tin supermercado so ta wordo afecta pa e regla nobo y control di mercancia prohibi. “E no ta conta pa solamente supermercado pero otro tipo di negoshi tambe” minister di economia Mike de Meza a bisa NoticiaCla.com diamars atardi. E mandatario ta mustra cu esnan cu ta keha cu nan ta keda pega cu e productonan awor, no mester tabatin nan na prome lugar. Pues e no por yuda cu esey. Di otro banda, a mustra cu lo duna un tempo di gracia pa por atende cu e situacion y toch topa otro di cierto forma. Ta trata di productonan cu normalmente no ta pertenece den un supermercado, manera aparato electronico y panja por ehempel. 

Mientras cu e mandatario no a bisa con largo e tempo di gracia lo ta, e ta stipula y unabes cu e tempo vence, lo cuminsa subi caya y haci e control necesario. “No ta asina cu nos ta subi caya mayan y cuminsa wak e lugarnan” de Meza a sigui bisa. “Cartanan a wordo skibi cu den futuro lo haci e controlnan. Nos lo sinta cu economische zaken pa fiha un posicion pa wak ki ora ta bon pa haci e tipo di control y tambe pa anuncia esaki publicamente.

E keho a bin e siman cu a pasa ora cu un grupo grandi di chines cu ta donjo di supermercado, a reuni cu otro y mustra nan disgusto pasobra nan a haya un carta cu ta indica cu nan no por bende cierto productonan. Nan rabia tabata mas bien cu no a avisa nan cu anticipacion, y cu awor nan lo haya nan mes cu productonan cu nan no por bende mas. Pero manera minister a splica, esaki awor lo keda regla di tal forma cu tur partido ta beneficia di dje.