Directiva retira di SPA ta keda den funcion te proximo eleccion

ORANJESTAD – Aunke cu e directiva di sindicato di polis (SPA) a tuma nan retiro e siman aki, nan lo keda temporalmente den funcion te ora cu tin eleccion atrobe. E sindicato a manda un comunicado splicando e situacion cu a surgi recientemente cu a conduci na retiro di e directiva, y argumentonan door di cierto miembronan descontento.

REUNION

E prome punto tabata e reunion di dialuna 9 di April ultimo. Aki a dicidi di trata e punto di agenda # 5 cu ta e mocion di desconfianza contra e directiva, entrega pa un di e miembronan, Omar de Kort. A cuminsa un discusion den sala riba kico por y no por. Eynan a dicidi cu a base di interes general di cuerpo polisial, e presidente y vise-presidente na e momento ey a tuma e posicion di declara cu lo ta mihor pa nan dos tuma nan retiro como miembro di bestuur y habri caminda pa bini cu un eleccion di un directiva nobo. Asina tur miembronan sa kendenan ta sostene e directiva si of no. “A base di esaki y como muestra cu e directiva actual ta integro y transparente, e resto di directiva, den un reunion di directiva di dia 10 di April 2018 a dicidi cu e resto di miembronan di directiva ta sostene nan presidente y vice-presidente y nan tambe lo entrega nan retiro voluntario, entrante, dialuna 16 April 2018, segun e statutonan di S.P.A. ta stipula” e comunicado di SPA a sigui bisa.

RETIRO ‘EN BLOC’

Si directiva por a tuma nota den prensa y medionan social, pero no a ricibi e mensaje aki directamente, cu sr. Omar de Kort, a expresa cu directiva di S.P.A. a tuma nan retiro den ‘bloc’ y cu e lo a lanta un comision cu lo bay encarga nan mes cu e eleccion nobo.

DIRECTIVA TEMPORAL

Directiva kier aclarea cu loque sr. Omar de Kort a declara ta contra Statutonan y huishoudelijk reglement di S.P.A. pasobra e directiva actual, na momento cu e miembronan di directiva a tuma retiro voluntario, tin 1 luna di aprobacion di nan retiro. Es decir, e directiva actual ta keda temporalmente den function te na momento di eleccion nobo. Ta logico cu S.P.A. no por keda sin directiva y e directiva aki lo sigui atende e lopende zaken di e sindicato pero si no por tuma decisionnan cu ta mara e directiva nobo cu lo sinta despues di eleccion.

ELECCION NOBO

Por lo tanto, directiva di S.P.A. a enfatisa cu e directiva actual saliente lo bay ta encarga cu e eleccion nobo manera statutonan di S.P.A. y huishoudelijk reglement y no sr. Omar de Kort y su comision. Esaki por sosode solamente si e Directiva wordo manda cas cu den e caso aki no ta asina. “ Nos como polis ta traha diariamente segun nos leynan vigente y cu integridad, mescos ta conta tambe pa directiva di S.P.A. cu ta traha a base di e reglanan stipula den nos Statutonan y huishoudelijk reglement y mester garantisa pa organisa y ta un deber incondicional pa tin un elecion transparente, segun reglanan stipula den nos stautonan y huishoudelijk reglement” e comunicado a sigui bisa.

REGLANAN

Alaves directiva kier recorda tur nos miembronan cu pa bo por pone bo mes eligible pa forma parti di e directiva nobo bo mester tene cuenta cu e siguiente punto nan:

-        Bo mester ta miembro di sindicato S.P.A. entrante 1 januari 2018.

-        Bo mester di 25 firma legal, di miembronan di S.P.A., pa back-up bo candidatura.

Pa loke ta trata e resto di rekisito nan (reglanan) pa cu e eleccion venidero, directiva lo por acerca cualkier miembro/ comision cu ta desea esaki pa conhuntamente organiza e eleccion aki, cu e ora, dia y lugar di e eleccion, pa asina e eleccion ta uno mas transparente posibel. Potret cortesia www.diarioaruba.com