Oduber riba proyecto hospital: The sky is not the limit!

ORANJESTAD – Minister encarga cu salud Dangui Oduber recientemente durante un reunion cu stakeholders di e proyecto di hospital, a bisa nan cu ‘the sky is not the limit’. Aki e ta mustra cu no ta permiti pa gastonan sigui subi sin mas. Segun e mandatario, e reunion tabata di un magnitud grandi caminda cu Horacio Oduber Hospital (HOH), Stichting Ontroerend Goederen Aruba (SOGA) y ABV a participa na esaki cu nan respectivo delegacionnan.

UN LIÑA

Oduber a haña sumamente necesario pa llama e reunion aki pa asina tur e partidonan hunto cu gobierno por ta riba e mesun liña di entendimento encuanto e proyecto aki. E mandatario por medio di e reunion aki a reitera claramente cu gobierno no ta bay acepta pa tin mas cambionan grandi na e asina llama ‘scope of work’ di e proyecto aki na unda cu lo por tin consecuencianan financiero, pa cu e gastonan di e proyecto.

AUMENTO HUUR

Actualmente e suma cu gobierno mester paga SOGA na huur ta 30 miyon florin pa anja, esaki tawata na inicio di e proyecto proyecta na 21 miyon florin caminda cu esaki a sigi subi den e ultimo anjanan aki te na 30 miyon florin pa motibo cu diferente cambionan a wordo hasi na e ‘scope of work’ na unda esaki a wordo amplia cu entre otro sala di operacion nobo, intensive care unit, microbiology, etc. cu a aumenta e ‘budget’ of miho bisa a pasa e ‘budget’ inicial pa mas cu 110 miyon florin extra.

SKY IS NOT THE LIMIT

E minister tabata hopi cla den e reunion aki cu ‘the sky is not the limit’ y cu e partidonan mester traha di awo padilanti cu miho comunicacion pa asina evita cu ta sigui bin gastonan adicional. Oduber a keda sorprendi pa tende cu pa cada siman cu e proyecto aki wordo ‘delayed’ e ta costa nos un suma di 90,000 dollar adicional. Ja caba ta premira cu e gastonan pa tardanza (delays) pa cu e proyecto aki lo costa pais Aruba 16 miyon adicional. Esaki ta absurdo y ta pesey e minister a pone hopi enfasis riba comunicacion entre HOH y SOGA caminda esaki mester ta uno optimal pa evita mas tardanza na e proyecto aki.