Oduber: Aruba Marine Park por bira realidad e aña aki

ORANJESTAD - Aruba Marine Park por bira realidad e aña. Asina minister di medio ambiente Otmar Oduber a declara pa medio di un comunicado e siman aki. Na NoticiaCla mientrastanto awe mainta, e mandatario a confirma cu e fundacion Aruba Marine Park lanta na 2010, lo cambia y lo mester lanta un fundacion nobo cu lo tin cu maneha e parke aki. E ta admiti cu enberdad tin un fundacion caba, cu e mes a inicia cu e proceso e tempo ey. “Pero e scenario di 2010, ta diferente cu esun awor” Oduber a bisa.

INICIO

Den e comunicado, e mandatario ta bisa cu e Marine Park ta un proyecto cu a inicia for di mas cu 3 aña pasa, un proyecto cual cu na cierto momento tabatin e leynan cla y lamentablemente esaki no a continua. “Actualmente como Minister encarga cu Infrastructura y Medio Ambiente, mi a piki esaki como un prioridad den nos maneho pa percura pa creacion di un Aruba Marine Park” Oduber a duna di conoce.

LEYNAN NECESARIO

TNO den e caso aki ta yudando den e proceso hunto cu expertonan di DNM y otronan, pa por yega na leynan necesario pa cual ta spera cu pa prome cu fin di e aña aki, e mandatario ta spera di por logra e institucion di un marine park pa proteha pa yuda proteha bida maritimo. Manera cu ta haciendo cu nos 16 areanan y manera cu e ta tuma luga den nos Parke Nacional Arikok.

STICHTING

Lo crea un stichting nobo pa maneha e parke maritimo, lo bay percura pa e haya su mesun entrada y no mester depende di Gobierno di Aruba. Nos ta kere cu esaki ta sumamente importante mirando e proteccion cu kier crea pa medio ambiente den nos awanan. Pero tambe proteccion pa actuacionnan cu tin cu ta wordo uza hopi biaha door di nos turistanan. “Haciendo uzo di e mesun fondonan cu wordo genera lo mester percura pa proteccion y permanencia di e actividadnan cu tin acuatico na Aruba y mantencion di e bida cu nos tin den nos awanan”, Oduber a termina bisando.