Pronto docternan local studia den region por traha na Aruba

ORANJESTAD – Pronto docternan di Aruba cu a studia den region, por cuminsa traha na Aruba mes. Awe mainta minister di salud Dangui Oduber a confirma e informacion aki pa NoticiaCla den forma di primicia. E mandatario no kier a prik un fecha exacto ainda si. “Mi ta kere si tur cos cana segun planning pa e aña aki ainda lo bira realidad completo” Oduber a bisa. Pa logra esaki mester adapta e asina yama B.I.G. ( Beroepen in de Individuele Gezondheidszorg). Esey ta e criteria pa cual ta permiti mediconan traha na Aruba.

BIG

“Despues cu nos regla e B.I.G., e studiantenan lo por traha na Aruba si en caso nan ta cumpli cu e requisitonan cu nos como pais lo stipula” Oduber a sigui bisa. “ Loke ta mas importante den henter e cambio grandi aki ta cu lo “waarborg” e calidad” e mandatario a sigui bisa. E la recorda cu ora cu gobierno nobo a sinta, el a institui un comision pa atende cu e B.I.G. registratie y e cambionan cu nan ta desea. Tur stakeholder a wordo inclui den e comision aki y pa 2 luna a sinta y discuti tur e posibilidadnan cu tin pa amplia e posibilidad pa studiantenan cu ta studia den regio wordo brinda e oportunidad pa practica na Aruba. “Esaki sigur ta un cambio grandi y un novum pasobra nunca antes den historia ningun minister di salubridad tabata tin e curashi pa haci esaki” Oduber a sigui bisa. E mandatario a confia na e portal aki cu na e momentonan aki nan ta den e fase final pa presenta e alternativanan cu tin riba mesa y dentro di poco esaki lo wordo anuncia oficialmente.

CABAY DI CAMPAÑA

Durante e ultimo campaña electoral, varios partido politico a uza e tema aki como cabay di campaña, primintiendo un tempo defini pa por logra cambia e regla di BIG. E tempo ey e minister na mando den salud Alex Schwengle, a bisa cu ta tuma por lo menos un aña pa haci e cambio responsablemente. Di otro banda por simplemente cambia e reglanan den un dia, pero esey tin risico mara na dje. Otro partidonan a priminti den 100 dia y otronan cu otro fecha. E mandatario actual responsabel pa salud a bisa cu e tin confianza cu e aña aki caba e cambio ta keda estableci pero no kier a duna un fecha exacto.