Comunicacion cu Venezuela ta solamente via Valencia y Punto Fijo

CARACAS/ORANJESTAD – Comunicacion aereo y maritimo cu Venezuela ta solamente via Valencia, estado Carabobo y Punto Fijo, estado Falcon por lo pronto. Mientras cu enberdad e relacion entre Venezuela y islanan ABC a ‘normaliza’ dialuna, esaki no kier men cu e trafico aereo y maritimo ta reanuda manera antes, usando p.e e aeropuerto di Maiquetia na Caracas y tur otro waf cu tabata uza antes. NoticiaCla a confirma cu su fuentenan cu e unico aeropuerto cu por usa pa yega y sali di dje na Venezuela ta esun di Valencia, esta aeropuerto Arturo Michelena, y pa waf por uza solamente esun di Punto Fijo, esta waf di Guaranao pa e islanan ABC. Esaki ta pa duna tempo pa por conforma e comisionnan mixto cu a palabra den e acuerdo. Tanten ta uza solamente e dos puntonan di salida di Venezuela.

NO TA BUSINESS AS USUAL

Aunke cu a yega na un acuerdo entre Hulanda y Venezuela den fin di siman, esaki no kier men cu cos ta ‘business as usual’. Asina prome minister Evelyn Wever Croes a bisa dialuna durante un conferencia di prensa. Esaki ta cuadra tambe cu e regla ‘nobo temporal’ cu tin. Berdad cu e trafico entre e paisnan pa loke ta pasahero y mercancia ta sigui. Pero fuera di loke a bisa caba, a mustra cu lo tin control mucho mas estricto riba e entrada di hende y producto. A haci apelacion tambe na comerciantenan cu ta importa fruta, pa haci esaki di un forma legal y tin nan documento na ordo. Kico tabata diferente cu e acuerdo na januari, Wever no por a bisa, pero a indica cu e no tabata hopi diferente. Cambio di minister (Blok) y su determinacion pa resolve e asunto, tabata determinante pa keda cla cu e acuerdo e biaha aki si.

PROME BUELO

E prome buelo comercial di Aruba pa Venezuela a tuma lugar dialuna atardi caba, cu tabata e avion di Aruba Airlines for di Valencia. Pa e ocasion ey, tabatin e delegacion di gobierno Venezolano lidera pa minister di transporte Carlos Osorio y e director di e aerolinea.