Banco tin pista ken por a ‘publica’ informacion confidencial den media

ORANJESTAD – E banco for di unda e informacion confidencial a keda publica e siman aki, -Banco di Caribe-, lo tuma medida contra e persona cu lo a saca e informacion aki. NoticiaCla.com a compronde di su fuentenan yega na e instituto financiero, cu e loke a sosode a shock e personal di e banco, y ta riba un bon pista di ken e persona aki ta. NoticiaCla.com a compronde tambe cu e gerente y su directiva a reuni extensamente riba e asunto aki.

Manera ta conoci, e siman aki un matutino a publica varios potret di loke ta aparenta di ta un ‘screen shot’, esta un imagen di loke tin riba un pantaya di un computer, di informacion confidencial di un cliente di e banco. Esaki ta un problema serio mirando cu e ta atacha tanto credibilidad di e banco, como di e cliente en cuestion. E hecho so cu e informacion a sali, los di e meta cu esaki tin su tras, ta uno cu por crea problema pa hopi hende y e banco.

E informacion publica den e caso aki, ta di tata di lider di partido politico MEP, Evelyn Wever Croes, cu a confirma diamars mainta na NoticiaCla.com cu e tata a entrega keho contra e banco, y cu no ta descarta cu lo kier envolve Banco Central tambe den e investigacion aki. Segun Wever na NoticiaCla.com, e informacion publica, ta referi na un compania di su tata, y cu e mes, no ta aparece den e informacion publica. “Mi tata naturalmente a keha cu banco” Wever a bisa.