Companianan estatal a yuda gobierno cu mas dividendo

ORANJESTAD – Pa por a yuda cera un buraco financiero recientemente algun compania estatal di gobierno a yuda door di contribui cu duna mas dividendo cu normal. Prome minister Evelyn Wever Croes a confirma esaki dialuna mainta durante un conferencia di prensa. Segun e mandatario ora cu a bay purba restructura e parti financiero, pa reduci e.o. e deficit, a bin cu e crisisheffing di 2. 5%. Sinembargo esaki no a resulta suficiente pa cual a opta pa bay busca cerca e companianan estatal di gobierno.

CONTRIBUCION

Gobierno a acerca e companianan cu varios peticion. Entre nan, pa nan tambe bay den plan di austeridad, unda cu mester pensa e.o. pa biaha menos y usa skype pa reuni, cumpra menos auto y mas. A pidi nan pa bin bek aki dos siman cu e resultado di nan quick scan y wak kico tur nan a logra. Ademas a pidi si por duna mas dividendo cu ta normal. Algo cu dos compania a bay di acuerdo mesora cu ta RDA y Utilities (e compania madre di WEB y Elmar) , Particularmente Refineria di Aruba cu a duna 6 miyon extra y Utilities cu a duna 25 miyon, pero di cual gobierno a opta pa uza solamente 18 pa awor. Algun otro compania a opta pa no duna nada, aunke cu nan a raporta ganashi. Pa eseynan, gobierno lo atende cu nan despues, segun e prome mandatario. E mandatario no a bisa exactamente cuanto tur a duna, pero a logra colecta entre 38 pa 43 miyon florin extra cu sigur a yuda cera un buraco.