Wever: Acuerdo cu Venezuela no ta nifica ‘business as usual’

ORANJESTAD – Aunke cu a yega na un acuerdo entre Hulanda y Venezuela den fin di siman, esaki no kier men cu cos ta ‘business as usual’. Asina prome minister Evelyn Wever Croes a bisa dialuna durante un conferencia di prensa. Berdad cu e trafico entre e paisnan pa loke ta pasahero y mercancia ta sigui. Pero fuera di loke a bisa caba, a mustra cu lo tin control mucho mas estricto riba e entrada di hende y producto. A haci apelacion tambe na comerciantenan cu ta importa fruta, pa haci esaki di un forma legal y tin nan documento na ordo. Kico tabata diferente cu e acuerdo na januari, Wever no por a bisa, pero a indica cu e no tabata hopi diferente. Cambio di minister (Blok) y su determinacion pa resolve e asunto, tabata determinante pa keda cla cu e acuerdo e biaha aki si.