Acuerdo firma entre Venezuela y Hulanda ta data di aña 2013

CARACAS/ORANJESTAD – Mientras cu Venezuela y gobierno di Reino Hulandes a firma un documento diasabra cu a resulta den reapertura di e frontera entre e paisnan menciona, e documento original ta data di 2013 caba. Ademas, ta considera esaki tambe parti di e acuerdo palabra na januari di e aña aki. Asina e vice presidente di Venezuela El Aissami a bisa riba su cuenta twitter.

ULTIMO ORA

E eliminacion di e blokeo entre Venezuela y islanan ABC diasabra, tabata consecuencia di un reunion di ultimo ora diasabra entre minister Hulandes Stef Blok, minister Venezolano Wilmar Soltedo y vice presidente Venezolano Tareck El Aissami. E reunion a produci un documento di 5 punto, cu dos minister a firma finalmente. Y ta basa nan mes riba un memorandum di entendimento firma for di aña 2013. E bishita di Blok pa Venezuela no tabata uno anuncia oficialmente, sino mas bien a tuma lugar ultimo ora, ora cu a haya garantia di Venezuela cu contrario na januari ultimo, awor si nan tabata cla pa firma.

ACUERDO

Entre e 5 puntonan, tin entre otro cu ambos pais lo inicia e proceso duanero pa comproba origen di producto cu ta keda transporta entre e destinacionnan menciona. Tambe ta traha riba e mecanismo pa debolbe bienes cu a keda traspasa den un forma illicito entre e paisnan en cuestion. Tambe ta lanta un comision mixto intergubernamental entre Venezuela y gobierno di Reino Hulandes, cu ta atende temanan manera migracion y delincuencia organiza. Lesa e acuerdo AKI. Potret cortesia twitter di El Aissami.