Corte: Den caso di otorga kiosco, ex minister a actua contra orden publico

ORANJESTAD – E caso recien di gobierno contra 8 kioskero cu a perde nan caso, a hala atencion den mas di un forma. NoticiaCla a mustra cu lo bin bek riba e caso aki, ilustrando atencion cu huez a duna riba actuacion di gobierno (lesa minister) den e caso aki. Ta trata di e forma con un ex minister a actua den e caso aki pa cual huez a ‘hala su orea’ den e sentencia di 8 pagina. Aki huez ta mustra e.o. cu e ex minister e tempo ey (Sevinger) a actua contra ‘orden publico’, huur kiosco contra conseho di DOW, y a tuma lugar den forma no transparente.

CONFIANSA

Segun huez, un ciudadano mester por confia riba un ‘compromiso’ cu gobierno ta haci cune, pero mes momento e mester ta protegi contra actonan di un minister si esaki no actua segun reglanan stipula. Algo cu a sosode den e caso aki segun e huez. “E forma no transparente (incomprendible) cu a otorga e compromiso (pa un kiosco) y e forma incomprendiblemente lihe cu a haci esaki, ta pone e huez pensa cu a actua segun un ‘afscheidsbeleid’, y contra orden publico”. Esaki segun e huez, ta base pa e kioskeronan en cuestion desaloha e kiosconan.

WEGA POLITICO

Di otro banda segun e caso tabata prosegui, huez a compronde di un di e kioskeronan, cu promesa a wordo haci tambe pa e gobierno actual (minister actual) cu e persona lo sigui cu e kiosco aki. Como tal huez no ta haye ‘inconcebible’ pa pensa cu e otorgamento di kiosco ta ‘continuacion di un wega politico’. Pues, aunke cu tin cambio di gobierno, e wega politico lo por continua. A mustra tambe cu mientras cu tin solamente 8 persona cu tabata den e caso aki, tin posibel mas caso na caminda. Y mirando cu awor si, gobierno a stipula reglanan for di februari 2018 riba e proceso di otorga kiosco, huez lo uza e reglanan aki ora si tin mas caso cu por bin dilanti cu ta encera otorgamento di kiosco. Pues basicamente no ta asina asina gobierno lo por duna un kiosco, y pa evita wega politico, huez lo uza e reglanan stipula ora di otorga kiosco. Lesa e sentencia AKI.