Ruiz: Presupuesto 2018 ta cumpli cu recomendacion di CAFT

ORANJESTAD – Presupuesto 2018 di pais Aruba ta cumpli cu recomendacion di e colegio di supervision financiero, CAFT. Por lo menos segun minister encarga di finanza Xiomara Ruiz Maduro. Ayera diahuebs atardi, Ruiz-maduro, den nomber di gabinete wever-croes a entrega presupuesto 2018 na Parlamento.

NOTA DI CAMBIO

Den presupuesto 2018, e mandatario a indica cu lo tin un nota di cambio den dje den cua ta presenta e informacion cu CAFT a trece 2 di maart ultimo. Esaki ta e comentarionan riba e concepto cua a tene cuenta cu nan debidamente den e nota di cambio aki. Segun e mandatario, e ta un presupuesto cu ta conta cu un deficit di 3 porciento cu ta 150 miyon florin. “Esaki ta bou di e 3.1 porciento di deficit di 2017 cumpliendo asina cu e recomendacion y of e comentario di CAFT den e parti aki” Ruiz a bisa

INVERSION

Ruiz-maduro a anuncia cu presupuesto 2018 ta conoce inversionnan tambe. Gobierno ta kere cu como pais mester mustra curashi pa na e banda fiscal tuma e pasonan cu tin cu tuma pa yega na un situacion financiero manehable pa e pais haciendo lo corecto. “ Na e banda di gastonan tambe nos a cumpli pa baha esakinan pa loke ta trata operacion di gobierno. Banda di esakinan, gobierno a percura tambe pa inversionnan necesario pa nos pais” Ruiz a sigui bisa. A bisa cu lo haci inversionnan social pasobra ta mira e situacion social explosivo di nos pais den e ultimo añanan. Lo haci inversionnan den infrastructura, casnan social cu tin mester tin fondo aloca pa esaki, y lo haci inversionnan den siguridad. “ Un pais sigur ta duna e siguranza pa su pueblo y pa turismo cu na e momento aki ta nos unico pilar economico” e mandatario a sigui bisa.

CRECEMENTO ECONOMICO

E mandatario ta sigui bisa cu Aruba a sali for di un crecemento economico di un porciento cua ta uno hopi modera. Esaki tin di haber cu e hecho cu e refineria, e trabaonan di CITGO no a avansa manera a wordo premira. E daño ta hinca caba den presupuesto 2017 pa cua motibo den 2018 nos no ta conta cu e parti aki y ta traduci su mes den un crecemento hopi modera of conservativo di un porciento.

GOBERNADOR

Diahuebs atardi, gobernador di Aruba Alfonso Boekhoudt a firma presupuesto 2018 y awo esaki ta na Parlamento. Parlamento awo tin e tarea di studia e presupuesto, traha riba nan preguntanan pa asina pronto presupuesto 2018 por wordo trata y aproba.

DEADLINE

Deadline pa esaki ta dia 30 di april proximo. Mientrastanto gobierno ta keda en espera di e fecha na unda presupuesto 2018 lo wordo trata na Parlamento y tur preguntanan cu Parlamento y pueblo tin por wordo contesta debidamente.