A elimina prohibicion pa ambtenaarnan Hulandes bula cu InselAir

DEN HAAG/ WILLEMSTAD – E prohibicion pa ambtenaarnan Hulandes bula riba avionnan di InselAir Internacional a keda revoca. Asina minister Hulandes di infrastructura van Nieuwenhuizen a declara den un carta na presidente di Tweede Kamer di Hulanda awe. Motibo ta cu e autoridadnan competente a indica cu tur e motibonan pa preocupacion a keda elimina. Esey no kier men cu no tin mas control, pero cu mas bien lo tin un control continuo si. Pero mes momento, ambtenaarnan di Reino por bula atrobe cu e aerolinea.

PROHIBICION

Tabata practicamente un aña pasa na februari di 2017 cu gobierno di Hulanda a impone un prohibicion riba su ambtenaarnan pa bula riba avionnan di InselAir International. Esaki pasobra e aerolinea tabata carece di control y seguridad segun Hulanda. Mesora a impone un control di entre otro Inspectie Leefomgeving & Transport (ILT) hunto cu e departamento di aviacion civil di Corsou (CCAA), cu a dura bastante.

CONTROL

Segun e mandatario, na januari di e aña aki (2018), un team di CCAA a tene un inspeccion administrativo na Hulanda y na februari di e aña aki un team di inspector di ILT tabata na e sitio. Conclusion di ILT tabata cu e cooperacion entre ILT y CCAA riba recertificacion di InselAir International a cana positivo. Ademas e resultado di e inspeccion di CCAA a keda comparti cu InselAir, y cu e aerolinea ta aplicando e medida di mehoracion. Pa loke ta e gerencia di InselAir International, a palabra cu e control mas severo di CCAA (implementa na 2017) lo continua den e periodo siguiente, y cu e proceso pa soluciona problema, lo keda monitoria hopi di cerca di CCAA y cu lo pidi feedback di ILT. Ademas cada dos siman lo tin intercambio di informacion entre CCAA y e grupo tecnico di e aerolinea pa controla e progreso. Tin mas cos pendiente pa sigura e seguridad di aerolinea na Corsou cu ta encera un mandado huridico mas severo cu CCAA lo haya proximamente pa por haci nan trabou miho. Lesa e documento completo AKI.