Wever: CITGO tin fondo atrobe y ta bek na periodo prome cu slow down

ORANJESTAD - Pa awor CITGO tin fondonan pa sigui inverti pa cual e “slow down” lo no ta en efecto mas. “Pues nos ta bek na e situacion di prome cu e “slow down” “ Asina prome minister di Aruba Evelyn Wever Croes a bisa NoticiaCla diabierna mainta trempan, riba e reunion cu a tuma lugar na Aruba e siman aki. Wever a bisa cu e mes no a reuni cu e ehecutivonan, pero cu representantenan di gobierno si a sinta diaranson y a papia cu e delegacion.

SLOW DOWN

Segun Wever, Citgo a informa Aruba cu despues di nan ultimo anuncio di “slow down” nan a hasi algun cambio interno y ta mira posibilidad pa sigui inverti den e refineria. “ Nan ta optimista cu den algun luna por haya e financiamento necesario pa completa e trabaonan y keda cla ainda na tempo” Wever a bisa. E bon noticia ta cu - si ta asina - no mester kita hende for di trabou, segun e prome mandatario.

COMUNICACION

Wever a sigui bisa cu gobierno ta satisfecho cu por lo menos e linea di comunicacion ta habri y cu Citgo ta comunicando cu Gobierno. Sinembargo Citgo no por demostra ningun inversion substancial ainda. Si por a mustra planes adapta.

PALABRACION

“Pero cu plan riba papel nos no a yega unda nos mester yega ainda” Wever a sigui bisa. A palabra cu Citgo lo sigui tene gobierno informa mientras nan ta sigui busca solucion pa e problema di financiamento pa mas despues den aña.