Sydow: Ambientalistanan ta contra tur proyecto, no solamente Isla di Oro

ORANJESTAD – E problema di e proyecto hotelero na Isla di Oro, no ta Isla di Oro mes, sino simplemente cu esnan cu ta opone e proyecto, no kier ningun proyecto mas na Aruba. Asina e representante di e desaroyadornan di e proyecto, Franz Sydow a bisa NoticiaCla e siman aki. Mientras cu e ta respeta y sa cu tur hende tin derecho di protesta, e la bisa e portal aki cu e no ta compronde e motibo di e protesta di e grupo di ambientalistanan dialuna ultimo. E cambio radical di e ambientalistanan ta un pregunta pa Sydow, pero no obstante tur esaki, e ta sigui kere cu e proyecto ta bon y lo continua su esfuerzo.

ROP

Sydow a confirma cu e ta conciente cu e continuacion di e proyecto ta depende di e Ruimtelijke Ontwikkelings Plan (ROP), y cu sin esaki, berdad no tin proyecto. Bisando esey sinembargo, el a confirma tambe cu e tin palabracion cu gobierno actual cu nan ta trahando riba e ROP pa cambia esaki. No por a duna un fecha, pero e tabata ‘sooner than later’, esta no un fecha exacto pero mas sigur e aña aki. A haya siguranza di gobierno cu nan ta sostene un proyecto di e magnitud aki, semper y cuando e ROP sostene esaki.

NGO

E grupo di ambientalistanan 3 aña pasa (no tur) a topa cu Sydow y su grupo, y a expresa nan preocupacion y mes momento duna nan input di kico tur mester tene cuenta cune pa e proyecto bira uno cu nan (e ambientalistanan) por biba cune. Tres aña despues, parse cu un grupo di nan a cambia nan pensamento radicalmente y no kier tende mes di e proyecto, cu of sin cambio. Simplemente nan no kier e proyecto sigui mes. Esaki, siendo cu Sydow ta bisa cu tur e inquietudnan a keda desaroya den e proyecto pa cumpli asina cu tur hende. “Mi ta desea di sa kico e detayes ta di nan preocupacion” Sydow a bisa, y mas aun pakico nan a cambia nan pensamento.

GOBIERNO

E proyecto a cuminsa durante e gabinete anterior, y e gabinete actual a ratifica e plan cu Sydow, pues eynan no tin problema. Simplemente e ROP mester cambia, y nan ta ok. Cu e cambio, ta bin acerca cu e desaroyadornan mester haya acceso na e awa rond di e pida isla (di Isla di Oro), pa nan por ubica e cabananan remoto riba dje. E permiso ey, nan a kere di tabatin, pero a resulta despues di no tine.

MEDIO AMBIENTE

E proyecto ta uno netamente ambiental, unda cu ta destina esaki pa e tipo di eco turismo. Pues ta percurando, segun Sydow, pa cumpli cu tur e rekisitonan pa haci e proyecto aki segun regla internacional y asina haya acreditacion pa por bin na remarke pa e nombracion aki. Esey ta riba su mes, un garantia cu e proyecto ta tene su mes na e reglanan ambiental, cu ta nifica entre otro proteccion di e mangrove y e awa rond di dje. Sydow a sigura cu tin henter un plan hinca den otro pa rebiba e mangrove y e sitio total rond, cu aworaki ta den decadencia total. De hecho, segun Sydow, unabez completa, e proyecto lo duna e area completo e bida cu e merece.

PERSONAL

Sydow ta sigura e portal aki cu e no tin pensa di ‘give up’, aunke berdad tin momento cu e ta pensa, kico e hendenan kier realmente na Aruba. E ta un stranhero biba pa mas di 20 aña riba e isla, y tur su yiunan ta rubiano. E proyecto no ta mara na tempo, pues e tardanza inusual aki no ta perhudica e proyecto su continuacion. Den otro proyecto, mas un proyecto tarda, e inversionistanan ta bira nervioso y ta hiba e proyecto otro caminda. Den e caso aki, Sydow a confia e portal aki cu otro isla den region manera Corsou, Bonaire y Puerto Rico a mustra interes, pero e ta insisti cu e proyecto ta uno pa Aruba y tin tur confianza cu esaki lo logra. Unabez cu e tin tur documento cla y cu por cuminsa cu e construccion, dos aña despues e proyecto mester ta completa, segun Sydow.