Landadornan di Aruba ta sigui prepara pa e ‘hazaña’ di distancia largo

ORANJESTAD – E landadornan di Aruba Davy Bisslik, Deaxo Croes, Stephan Thijsen, Wendy Kock y Lori King (USA) lo tin un otro 'long distance open water training' e diasabra aki, 7 di april 2018, den preparacion pa e hazaña cu ta na caminda, cu ainda pa motibo logistico no por wordo menciona ainda. E distancia cu lo landa e diasabra aki ta calcula di ta alrededor di 27 KM. E landadornan lo baha awa na e punta mas p'ariba di Aruba cu ta yama Labadera manera cu e prome rayonan di solo sali. Ta calcula cu esey lo ta banda di 6.30 am. Lo landa banda zuid di Aruba te na altura di Manglo halto. Aki ta drenta lagun y lo sigui den direccion west te na Surfside. Aki lo drenta den e area di waf y sigui bai west. E final lo ta na Casa del Mar y ta calcula cu e prome landador lo yega banda di 1.00 or PM.

Cada landador lo wordo acompaña pa su propio boto riba cual e tin su propio coach/ayudante y tambe cada boto lo tin un persona cu ta lastra na cabuya patras di e boto cu ta vigila y observa pa posibel peliger. Cada landador lo tene su mes tambe na un schedule estricto di alimentacion y hydratacion cu ta necesario ora di tipo di entrenamento asina.

Landamento den lama no ta igual na landa den pisina. Mester tene cuenta cu factornan manera biento, altura di olanan, temperatura di awa y aire, visibilidad den awa y coriente. Tur esaki ta bow guia di e legendario coach y landador Roly Bisslik kende 30 aña pasa a landa di Venezuela pa Aruba. Ta pidi pa tur boto riba lama pa tira bista pa e landadornan aki y pa keda banda zuid pa asina e huma di motor no afecta nan.