Pa proyecto Isla di Oro continua, mester cambia ROP

ORANJESTAD – Tanten cu e Ruimtelijk Ontwikkelings Plan (ROP) no cambia, e proyecto di Isla di Oro no por continua. Asina minister di turismo Dangui Oduber a bisa NoticiaCla. Manera ta conoci, dialuna ultimo tabatin un protesta di un grupo di NGO (Non Gubernamental Organization) pa para e continuacion di e proyecto. “ Como gobierno nobo nos a haya presentacion, y pa e proyecto aki por continua mester haci cambio di e ROP” Oduber a bisa e portal aki. Mes momento a mustra cu gobierno ta sostene proyectonan cu ta diversifica nos producto turistico. “Na ningun momento a haci ningun promesa na ningun inversionista pa un of otro proyecto” Oduber a sigui bisa.

ABC

Presidente di Aruba Birdlife Conservation (ABC) Greg Peterson a declara dialuna cu nan ta protesta e proyecto y no kier e proyecto continua. No tin ningun areglo, of forma pa yega na otro. Como tal e unico solucion cu nan kier mira, ta pa e proyecto para. Ni si bin cu ahustenan, nan no ta acepta esaki. Ademas Peterson a cuestiona e hecho cu durante campaña electoral aña pasa, e partidonan cu awe ta den gobierno, a priminti cu nan lo proteha e area aki como un di e 16 areanan di naturalesa di Aruba. Pero despues cu e partidonan a forma coalicion, ta manera cu nan a pone tur cos un banda y no ta duna oido na e loke cu nan a priminti.

PASADO Segun Oduber, esaki no ta berdad. Oduber a sigura e portal aki cu tempo e tabata den parlamento como miembro di fraccion di MEP e proyecto di Isla de Oro aki a wordo presenta na comision di turismo. E tempo ey te hasta fraccion di AVP a sostene e proyecto incluyendo e gobierno di AVP teniendo cuenta cu e ta un desaroyo nobo y upscale. “Nos sigur ta scucha e preocupacion di comunidad y tambe tene cuenta cu e NGO’s pero na final di dia e hende pa nos ta importante pa e por tin un porvenir aki na Aruba” Oduber a bisa. Segun e minister di turismo, tur desaroyo nobo ta wordo discuti y promer cu un decision final wordo tuma tur aspecto ta wordo considera!