‘Money Zombie’ di Colegio Santa Filomena ta gana e UNICEF ‘Kinderrechten Filmfestival’

ORANJESTAD - Na momento cu bo siña un mucha tocante su derecho, bo ta siña e mucha cu otro persona tambe tin derecho. Ariba dialuna 26 di maart a tuma lugar e ‘première’ di e UNICEF ‘Kinderrechten Filmfestival’. Durante e ‘première’ di e UNICEF ‘Kinderrechten Filmfestival’ e alumnonan di Colegio Santa Famia (klas 6A), Colegio Santa Filomena (klas 5A), Mom Plaisir Basischool (klas 5A), Prinses Amalia (klas 6B) y Puis X School (klas 4A) a presencia nan pelicula tocante derecho di mucha ariba e pantayanan grandi di Caribbean Cinemas. Hunto cu su excelencia gobernador di Aruba, su excelencia primer minister di Aruba, parlamentarionan di diferente fraccion y invitadonan for di e tereno social, e muchanan a disfruta nan pelicula.

E mainta a cuminsa caminda e alumnonan a yega y ser ricibi ariba un tapijt cora. Despues cu tur hende a tuma aciento e mainta a cuminsa. E peliculanan cu a ser pasa tawata ‘Money Zombie’ (Colegio Santa Filomena, klas 5A), ‘Mucha mas atencion’ (Mom Plaisir Basischool, klas 5A), ‘Deseo di Roslin’ (Colegio Santa Famia, klas 6A), ‘Payback time’ (Prinses Amalia, klas 6B) y ‘Tur mucha tin derecho di tin un Famia’ (Puis X School, klas 4A).

Inspiracion pa e peliculanan a bin for di un pintura tocante derecho di mucha cu un mucha di e klas ganador di cada scol a pinta. Prome cu traha e pintura e muchanan a ricibi les tocante derecho di mucha. Cu e proyecto aki UNICEF Hulanda y Fundacion Telefon pa Hubentud Aruba kier siña e muchanan ariba un manera interactivo y creativo tocante nan derecho. Cu e proyecto aki e mucha y su mayornan ta siña mas tocante derecho di mucha. E mucha ta siña para pa su derecho cu respect y ta siña respeta derecho di otro.

Durante e ‘première’ a saca un scol ganador cu lo bai representa Aruba durante Curacao International Filmfestival den e weekend di 13 pa 15 di april na Curacao. Durante e Curacao International Filmfestival nan lo competi cu e pelicula di scolnan di Bonaire, Curacao, Saba, Sint Eustatius y Sint maarten. E pelicula cu a resulta ganador ta ‘Money Zombie’ di klas 5A di Colegio Santa Filomena produci pa Artmando.