Oduber: Columnista ta bruha informacion riba asunto di Dump Parkietenbos

ORANJESTAD – No tin ningun deal traha pa e asunto di Parkietenbos, manera cu a keda raporta den e popular columna di Rona Coster, Bati Bleki. Mas bien, e columnista a bruha dos cos cu otro. Coster a raporta diamars den su columna cu el a tende cu tin un acuerdo entre Siemens y Ecogas pa atende e problema di Parkietenbos, como si fuera e proyecto a keda otorga. Tanto e minister di medio ambiente Otmar Oduber como esnan di EcoGas a desmenti e informacion aki na NoticiaCla. E mandatario encarga a mustra cu e dos companianan enberdad a participa manera tur otro compania den e asina yama (Request for Information (RFI), como parti di e procesopa yega na un solucion pa e problema na Dump di Parkietenbos.

RFI

Segun Oduber, mientras e companianan menciona ta simplemente un di e 20 companianan cu a inscribi pa e RFI, no cu tin ningun un deal cu nan pa e proyecto caba. Di parti di e otro grupo, e portal aki a compronde cu mas bien e columnista a bruha dos cos den otro, y a uni dos diferente asunto haciendo como si fuera tin un acuerdo pa e proyecto di dump. Aki ta trahando riba un acuerdo cu e companianan pero no cu a haya e deal pa resolve e problema na Dump. Pero aki e columnista a bruha e asunto di RFI y RFP y e deal cu ta ‘in the works’.