Artista Sandra van der linde su prome Exposicion na Alhambra Ballroom

ORANJESTAD - E artista Sandra van der Linde cu ta conoci pa cu su pinturanan celestial y su trabounan di workshop nan pa e muchanan artistico, cu ta elabora pintura, sketch y escultura pa mas di 5 aña caba, ta dunando resultadonan hopi positivo. Mirando cu Sandra van der Linde ya caba a forma varios evento pa su studiantenan, manera exposicionnan y painting contest, awo a dicidi di duna e pueblo di Aruba e oportunidad pa por maraviya nan mes y drenta den su mundo di soño y vision nan cu e mes ta biba durante su bida y a plasmanan den e pinturanan.

EXPOSICION

Diasabra 7 di april awor Sandra van der Linde lo ta exponiendo cuadranan nunca mira, pinturanan cu lo impacta spirito di hende, cuadranan unico y cu mensahenan penetrante y cu speransa pa hopi. Durante un anochi unico pa 4 ora largo na Alhambra Ballroom cuminsando for di 6:30 PM te cu 10:30 PM, lo tin e Dreams & Visions Exhibition. Sra. Sandra ta splica: Mi pinturanan ta manera cu mi ta drenta e realmo spiritual, saca un foto y trese na e mundo aki y mira locual e ta biba y tin den e otro dimencionnan. Pa mi ta algo completamente real, ya cu esun cu ta bibe, e mes por conte. Asina mes ciencia ta aproba esaki, ya cu tur hende ta soña, pero lastimamente no tur ta corda nan soño. Biblicamente for di buki di Genesis te Apocalipsis por ripara cu soñonan y visionnan ta sumamente importante, ya cu ta un otro manera di Dios pa comunica cu hende (Job 33:14 / Joel 2:28/ Hechonan 2:17). Nan ta experiencianan esencial, ya cu via soño nos ta wordu confronta cu shelo mes. Sra. Sandra ta remarca: humanidad a drenta un tempo caminda hende lo ta mas spiritual cu superficial.