ATIA a reuni cu stakeholders pa mehora proceso di importa producto

ORANJESTAD - Recientemente ariba iniciativa di ATIA a cuminsa un promer dialogo pa asina inventariza e puntonan pa mehora contacto entre tur partners cu ta den e cadena di importacion, cual ta un proceso esencial pa comercio y economia di Aruba. Asina e gremio comercial a informa pa medio di un comunicado. Segun e comunicado, den e reunion tabata presente ATIA, ASTEC, APA, y representantenan di lineanan di barco. E reunion a bai den un bon ambiente na unda comunicacion y intercambio di informacion ta un di e puntonan crucial cu a wordo atendi.

PUNTO DI SALIDA

E punto di salida ta cu e proceso di importa producto mester tuma luga na un manera mas eficiente posibel pa asina comercio por ricibi nan productonan na tempo, y alaves ASTEC, APA, y e transportadornan pa medio di e eficiencia aki, controla gastonan envolvi mas hopi posibel. Tin algun punto cu a wordo papia ariba dje, cu no ta cai bow control di e esnan presente pero si ta causa tardanza den e proceso y ta hasi e proceso mas caro y no productivo.

CONTINUA

ATIA lo sigui cu reunionnan cu otro organizacionnan y gobierno pa trata na elimina mas hopi posibel e factornan cu ta impedi mas eficiencia y productividad. ATIA a gradici tur presente y e conclusion ta cu esaki ta promer di varios reunion cu lo tin pa asina pa medio di dialogo purba mehora un proceso di vital importancia pa comercio y Aruba.