Gradus: Aruba a uza modelo economico robez pa maneha su finanzas

ORANJESTAD – Aruba a uza un modelo economico robez (pa maneha su situacion financiero). Y awor Aruba ta cosechando e frutanan amargo”. Asina presidente di e colegio di supervision financiero di Aruba (CAFT) Raymond Gradus a declara recientemente. Den un entrevista cu René Zwart a publica den e portal ‘Arubanieuws.nu’ y cu NoticiaCla a haya permiso pa reproduci fragmentonan, Gradus ta splica riba cada isla su situacion, y unda cu esun di Aruba a hala hopi atencion. Segun Gradus, pa stimula e economia di e isla den e añanan di recesion, e gobierno anterior a opta pa inverti di un forma anticyclistico. Algo cu pues awor Aruba ta pagando e ‘prijs’ pe, Gradus a bisa.

DEFICIT

,,E deficit pa 2017 a origina prome cu gabinete Wever Croes a sinta. Lesa nos consehonan riba dje numa” Gradus ta sigura, indicando cu no ta awor e deficit a wordo crea na 2018, sino for di tempo di e gabinete anterior. Mes momento Gradus ta sigura cu ja na 2015 e debe di Aruba a yega cerca di 80% di e Producto Interno Bruto (PIB). “Berdad cu Aruba a logra te cu 2016 pa cumpli cu e norma di deficit, pero esey a sosode cu yen di ‘cortamento y pegamento’ (refiriendo na e formanan incidental cu cual e gabinete anterior a logra su meta). Segun Gradus, e la tuma nota di e discusion politico di tiramento di culpa riba otro entre e gabinete anterior y esun actual. “Mi sa di e discusion, pero mi ta prefera mira e futuro. Tin hopi oportunidad tambe. E sector turistico ta booming. Tin mas forma pa diversifica e economia y crea un crecemento” Gradus a sigui bisa den e combersacion cu Zwart. A mira cu prome minister Wever Croes tin e ambicion pa drecha e situacion. Y e mester hacie tambe pasobra Aruba tin un economia ciclico. Cu esey, Gradus kier men cu ora cu Merca niester, Aruba ta haya un griep. “E bon ta cu e gabinete (nobo) a distancia su mes di e modelo economico di pasado” e presidente a sigui bisa.

CAFT NO TIN GEVOEL

Gradus ta conciente tambe cu Aruba ( y e otro islanan cu tin supervision financiero), constantemente (taba)tin critica riba e hecho cu e consehonan cu e colegio ta ‘sugeri’, hopi biaha no ta tene cuenta cu e situacion social di e isla(nan), sino mas bien ta consehonan fuerte cu e unico meta pa drecha e situacion financiero. E gabinete anterior den hopi instante a sigura e portal aki (NoticiaCla) cu e consehonan tabata hopi conservativo y cu CAFT no tabata importa ki impacto social cada conseho drastico lo por tabatin riba e isla. “No ta bay segun nos, pa corta (den economia), sino pa crea perspectiva” Gradus ta sigui bisa. “Finanzas publico duradero ta na bienestar di e pueblo. Y cu si gobernantenan ta haya nos fastioso tin biaha? Ami lo a preocupa si nan no a haya nos fastioso” Gradus ta sigui bisa den e entrevista.

TIGER DI PAPEL

Gradus tambe no ta reconoce su mes den e critica cu CAFT tabata ‘na soño’ y no tabata actua y a wordo gelabled como un tiger di papel of un tiger sin djente. “Mi no ta reconoce mi den e cuadro ey. Nos por pone e dede riba e heridanan, pero nan ta ‘den cuadro di Reino Hulandes’ paisnan autonomo” Gradus ta bisa di e critica ey di Aruba y otro islanan. “Nos ta supervisornan (financiero). Nan mes tin cu tuma decision y pasonan” Gradus a sigui bisa. E ta sigura si cu leynan ta ofrece CAFT pa duna nan consehonan mas peso pa wordo treci dilanti. Y esey sigur nos lo (sigui) haci” Gradus ta finalisa bisando.

Fuente: www.arubanieuws.nu y cu permiso di autor original René Zwart. Potret cortesia CFT.