Eerste Kamer ta reuni riba refugiado Venezolano pa Aruba y Corsou

DEN HAAG – Preocupacion di gobierno Hulandes riba e situacion di refugiado Venezolano na Corsou y Aruba a aumenta. Asina e periodista Rene Zwart ta raporta. Esaki ta nifica cu diamars awor Eerste Kamer di Hulanda a pone e topico riba agenda pa tratamento. E ora e comisionan di senado di Relacionan di Reino y Imigracion y Asilo ta bin hunto pa ‘discuti’ e problema.

Segun e raportahe, e razon pa e reunion ta e discusion entre gobiernonan di Aruba y Corsou y otro banda esun di Hulanda. Te cu awor, Den Haag (capital politico di Hulanda) a tuma e punto di bista cu e refugio di Venezolanonan ta un asunto interno di e respectivo islanan. Un peticion for di tanto Corsou como Aruba pa ayudo financiero a keda rechasa, y tambe e sugerencia di Aruba pa laga e refugiadonan bay otro teritorio Hulandes, manera e.o. Bonaire. Asina Zwart ta sigui raporta. Tur partido ta di acuerdo segun e raporta, cu e islanan Caribense no tin e capacidad pa tuma cantidad (mas) grandi di refugiado.

CORSOU

E tema Venezuela ta halto riba agenda e simana ki durante e reunion na Corsou diahuebs awor, durante e asina yama Koninkrijksoverleg Buitenlandse Betrekkingen unda cu e prome ministernan di Aruba, Corsou y St Maarten ta reuni hunto cu minister Hulandes pa Relacionan Exterior Stef Blok. Blok a sali dialuna mainta for di Hulanda pa cuminsa su bishita di 4 dia na St Maarten y caba esaki na Corsou.