Segun CAFT, crisisheffing lo por keda na vigor te 2020

ORANJESTAD – E intencion di gabinete Wever Croes ta pa mantene e medidanan temporal anuncia (crisis heffing), te por lo menos 2020. Asina CAFT ta bisa den su ultimo rapport publica fin di luna pasa. Gobierno mes no a duna un fecha exacto te ki tempo e medidanan impone ta keda valido, pero a bisa solamente cu nan ta keda introduci entrante 1 di juli 2018, y ta temporal.

CAFT

“ Despues di 2020, e reforma fiscal propone den e Financieel Economisch Memorandum (FEM) lo mester genera e mesun entrada cu e aumento di BBO, pa cual e aumento (temporal) por wordo revoca”, e colegio ta bisa textualmente. Como tal ta sali for di e punto di bista cu e medidanan lo permanece vigente pa 2 aña.

EFECTO DI CRISISHEFFING

E calculo presenta pa gobierno segun CAFT, ta mustra cu e aumento di BBO/BAZV ta genera un suma incidental na 2018, y despues esaki ta bira structural pa e siguiente añanan. Pa e prome aña (2018), e aumento di BBO lo genera un 48 miyon extra den caha di gobierno, sigui pa 103 miyon annual pa e siguiente dos añanan. Ademas ta papia di un 10 miyon adicional cu gobierno lo ricibi na entrada cu aumento di accijns riba gasoline. A subi esaki recientemente cu 2 cent, cu segun gobierno ta parti di e cambio despues cu algun aña atras, a reduci e accijns cu 10 cent riba gasoline.

COMPENSACION RETRASA

Segun e mesun rapport di CAFT, loke ta nan parecer, e ahuste na beneficio di comunidad, no ta bin na 2018, sino te na 2019. Ta trata di aumento di salario minimo, reduccion di loons y inkomstenbelasting. Pues mientras cu e crisisheffing si ta drenta na vigor e aña aki, CAFT ta papia di compensacion ‘retrasa’ pa comunidad, pues no ta introduci esaki simultaneamente ora cu introduci e heffing.

AZV

AZV tambe ta menciona den e rapport den sentido cu ta papia aki di un reduccion di e contribucion di gobierno di 28 miyon di gobierno na 2018, y cu e pueblo tin cu bay paga pe awor. Y e reduccion di gobierno su contribucion ta bira 68 miyon anualmente. Den un forma mas ‘dramatico’, CAFT ta sigui papia di un eventual independisacion di AZV cu ta nifica cu gobierno no tin cu contribui mes mas na esaki. Algo cu ainda no ta trata pa sa si esaki ta un pensamento realistico, y si e ta keda simplemente na un pensamento sin ehecucion.