Sospechoso di contrabando di oro ta keda den detencion

ORANJESTAD - Corte Superior a trata ayera e caso den apelacion cu abogado di e homber cu a wordo deteni na februari ultimo riba sospecho di contrabando di oro y falsificacion, a cuminza contra e decision di Corte den Prome Instancia pa alarga decision di e sospechoso aki. Abogado a pidi Corte Superior pa lanta of suspende e detencion.Corte Superior a rechaza e apelacion y a huzga cu tin suficiente sospecho serio cu ta hustifica detencion di e persona en cuestion.

E CASO

Riba 20 di februari Corte den Prome Instancia a yega na e mes decision aki. E sospechoso G.Z. a wordo baha riba 9 di februari ultimo for di un vuelo di KLM pa Hulanda y poni den detencion. E tabatin 46 bara di oro cu ne na valor di 2,1 miyon Dollar. E accion tabata un iniciativa di Afpakteam Aruba, Ministerio Publico, RST (Recherche Samenwerkingsteam) y KPA. E base di investigacion ta informacion procedente di Hulanda y Curaçao. Afpakteam ta un cooperacion di Ministerio Publico, Polis, RST, Aduana, Fiot (Fiscale inlichtingen- en opsporingsteam) di Departamento di Impuesto, FIOD (Fiscale Inlichtingen- en Opsporingsdienst), Marechaussee (KMar), Kustwacht Steunpunt Aruba y Meldpunt Ongebruikelijke Transacties (Meldpunt) y ta traha riba combati criminalidad financiero economico.