Rapport entrega na OM ta pa investiga asunto di tereno

ORANJESTAD – E rapport di investigacion cu fraccion di MEP a entrega na ministerio publico algun siman pasa, ta trata e.o. asuntonan regardando asunto di otorgamento di tereno den un forma illegal door di gabinete anterior. Asina NoticiaCla a compronde di su fuentenan. Lider di fraccion di MEP Rocco Tjon sinembargo no tabata cla of dispuesto ainda pa divulga na NoticiaCla den ki direccion e investigacionnan aki ta. Segun Tjon, ta practica cu no ta divulga nada y ta keda na OM si nan ta divulga den ki direccion esaki ta bay. “Nos no ta dispuesto pa haci esey (divulga informacion). Ta palabracion cu a haci cu fiscal mayor” Tjon a bisa. Esey no ta kita afo cu e portal aki tin e informacion ey. Entre e puntonan di investigacion, ta asunto di permiso y tambe otorgamento di tereno sin cu esaki tabata permiti.

INVITACION

OM a yama fraccion di MEP pa un cita diaranson y a bisa cu e sospechonan cu e fraccion tin riba e casonan, nan tambe tine y nan lo cuminsa ‘pak op’ e caso aki.